Ukraina Tış işleri nazirligi (TİN), dekabrniñ 18-nde ilhaq etilgen Qırımda, tintüvler ve tevqiflerge narazılıq bilgirip, bir kişilik piketlerde çıqqan faaliyetçilerge qarşı yapılğan mahkemelerni, «BMTde,Qırımda insan aqları boyunca qarar içün rey berüvden evel Rusiyeniñ qasten yapqan areketleri», dep saya.
Bunı Twitterde Ukraina TİNniñ sözcüsi Maryana Betsa yazdı.
Betsa: «İlhaq etilgen Qırımda yapılğan sahte mahkemelerini qatiyen taqbih etemiz. BMTde, Qırımda insan aqları boyunca qarar içün rey berüvden evel RFniñ qasten yapılğan areketleridir», – dep yazdı.
BMTniñ Baş assambleyasında Ukraina tarafından taqdim etilgen Qırımda insan aqları boyunca qarar leyhası içün rey berüv dekabrniñ 19-nda yapılacaq.
Dekabrniñ 18-nde Aqmescitte, daa evel tintüvler ve tevqiflerge cevaben bir kişilik piketlerge çıqqan qırımtatarlarğa qarşı 70-ke yaqın mahkeme oturışuvı ötkerilmekte. Faaliyetçilerge, tayin etilgen piket ötkerüv tertibiniñ bozulması munasebeti ile (Rusiyeniñ Memuriy tertip bozuv aqqında kodeksi, madde 20.2, 5-nci qısım) memuriy protokollar tizildi.
Mahkeme oturışuvları, cümleden, Aqmescit, Canköy, Aluşta, Suvdağ, em de İçki, İslâm-Terek, Qarasuvbazar ve Qurman rayonlarında ötkerilmekte. İçki işler nazirliginiñ Qırım boyunca ekspertiza merkezi tarafından «piketler bir maqsat, bir niyet ve umumiy teşkilât ile birleştirileler» şeklinde çıqarılğan hulâsa, qabaatlav tarafınıñ baş delili olaraq qabul etilmekte.
Qırımda oktâbrniñ 14-nde, Rusiye tarafından ilhaq etilgen yarımadada telükesizlik hadimleriniñ qırımtatarlarğa, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi.
