Link açıqlığı

«Fevral 26 işi» figurantları, müfti Ablayev olarğa itiraf etmek ve Çiygozğa qarşı ifade bermege teklif etkeni aqqında ikâye ettiler


Kremlniñ kontroli altında bulunğan Aqmescitteki Merkeziy rayonı mahkemesinde «Fevral 26 işi» boyunca oturışuvında kütleviy qarışıqlıqlarda iştirak etkenlerinde qabaatlanğan Mustafa Degermenci ve Ali Asanov sorğulandılar.

Qırım.Aqiqat muhbiri bildirgeni kibi, Ali Asanov ve Mustafa Degermenci mahkemede, yaqalanğandan soñ Qırım müftisi Emir Ablayevnen körüşüvleri olğanı ve o, olarğa itiraf etmek ve qırımtatar halqınıñ liderlerinden biri Ahtem Çiygozğa qarşı ifade bermege teklif etkeni aqqında ikâye ettiler.

Ali Asanov mahkemede, 2014 senesi fevral adiseleri vaqtında Aqmescitke, traktorğa yedek parçaları almaq içün kelgenini bildirdi. Onıñ aytqanına köre, o, iç bir qarışıqlıqlarda iştirak etmedi ve iç kimseniñ buyruqlarını eda etmedi. Barışıqlı miting esnasında Asanovda, o, daa evel ve daa soñra iç de körüşmegen zarar körgen Aleksey İvkin ile turmuş çatışması olıp keçti. Asanovnıñ aytqanına köre, o vaqıt o, qabaatlanğanlardan iç kimseni tanımay edi. Asanov, yaqalanğanından soñ tahqiqatçı oña tazyıq etti – yaqınlarda tintüvler yapılacağı ile qorquzdı, terciman bermekni red ete edi, dedi.

Mustafa Degermenci, barışıqlı mitingge köydeşlernen beraber kelgenini bildirdi. Emiraliyevden ğayrı muhakeme etilgenlerden iç kimseni evelden bilmedi, cemiyet tertibini bozacaq iç bir areket etmedi, iç kimseden buyruq almadı ve eda etmedi. Miting esnasında Degermencide, zarar körgen Şlâgin ile turmuş çatışması olıp keçti. Neticede zarar körgen onıñ tarafından uruldı ya da, daa doğrusı, «iteldi», dep añlattı qabaatlanğan.

«Fevral 26 işi» boyunca nevbetteki oturışuv dekabrniñ 25-nde olacaq.

2015 senesinde bir grup qırımtatar faaliyetçilerge qarşı 2014 senesi fevralniñ 26-sında Qırım Yuqarı Radası binasınıñ divarları yanında Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün mahkeme başlandı. Olarnı kütleviy qarışıqlıqlarda iştirak etkenlerinde qabaatlaylar.

Daa soñra mahkeme «Fevral 26 işi»ni ekige böldi: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nabiyevniñ işinden ayırıldı.

Rusiye akimiyeti oktâbrniñ 25-nde Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umerov ve Çiygoz Kyivge keldiler.

XS
SM
MD
LG