2017 senesi dekabrniñ 6-sı vaziyetine köre, 11 sabıq Aqyar şeer şurasınıñ deputatına qarşı devlet hainligini işlev şübhesi ile qabaatlav aktları mahkemelerge yollandı.
Bu hususta, Qırım.Aqiqatnıñ malümat talabına cevapen Ukraina Telükesizlik hizmetiniñ (SBU) Kütleviy haber vastaları ve cemaatçılıq ile munasebetler boyunca idaresi bildirdi.
SBUda, tahqiqat bölügi tarafından «Aqyar şeer şurasınıñ 56 deputatına qarşı Ukraina Cinaiy kodeksiniñ 111-nci maddesi, 1-nci qısmı (Devletke hiyanet) ile közde tutulğan cinayetni işlev şübhesi boyunca16 cinaiy iş tahqiq etildi», dep qayd ettiler. Olardan 11 şahısqa qarşı açılğan 11 iş, mahsus azırlav tahqiqatınıñ yapılması tertibi boyunca qabaatlav aktlarınen beraber mahkemege yollandı.
SBU idaresinde, 45 kişige qarşı açılğan 5 tahqiqat işinde, şübhe altında bulunğanlar qıdırılğanı içün mahkemeden evelki tahqiqat toqtatıldı, dep ilâve ettiler.
Qırım Muhtar Cumhuriyeti Prokuraturası Qırım.Aqiqatqa, qabaatlavları mahkemege yollanılğan bazı sabıq Aqyar şeer şurası deputatınıñ soyadlarını bildirdi: Natalya Avseykova, Dmitriy Belik, Gennadiy Plotnikov, Aleksandr Antonenkov, Gennadiy Basov, Oleg Antonenkov, Nikolay Dudkin, Sergey Burşteyn, Andrey Grigoryev.
Mezkür deputatlar şimdilik açıq menbalarda izaat bermediler.
Qırım Muhtar Cumhuriyeti Prokuraturası, 2017 senesiniñ dekabr ayındaki vaziyetine köre, Qırım Yuqarı Radasınıñ 75 sabıq deputatınıñ qıdırılğanı ilân etildi, dep bildire.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
