Bugün, dekabrniñ 18-nde, Qırımda daa evel tintüv ve insanlarnıñ tutıp alınuvına qarşı bir kişilik piketlerge çıqqan qırımtatarlarnen bağlı 70-ten ziyade mahkeme keçecek. Bu aqta Qırım.Aqiqat muhbiri haber etmekte.
Faallerge piket keçirüv tertibini bozğanlarınen içün (qomşu Rusiyeniñ Uquqnı bozuv Memuriy Kodeksiniñ 20.2 madddesiniñ 5 qısmı) memuriy protokollar tizilgen edi. Olar 10 biñden 20 biñge qadar ruble (4700-den 9400-ge qadar grivna – QA) miqdarında cöreme tölemege ya da mecburiy işlerge celp etilebileler. Tizilgen protokollarğa binaen, politsiya hadimleri bir kişilik piketlerni akimiyetten ruhset alınmadan keçirilgen kütleviy tedbir dep sayalar.
«2017 senesi oktâbrnñ 14-nde Qırım territoriyasında yerli akimiyet idare organlarından ruhset almadan bir kişilik piket şeklindeki açıq kütleviy tedbirde iştirak etti», – denilmekte protokollarda.
Mahkeme oturışuvları hususan Aqmescit, Canköy, Aluşta, Sudaq, ayrıca İçki, İslâm-Terek, Qarasuvbazar ve Qurman rayonınlarında da keçecek. Qabatlağan tarafnıñ esas isbatı Qırım MVDsi ekspert merkeziniñ «piketler bir maqsat, fikirnen birleştirlgen ve umumiy teşkil etildi» degen ekspertizasına bazanmaqta.
«Ekseprtke: kerçekten de bu plakatlar yekâne fikirnen birleştirilgen ve bir mevzuğa bağışlanğanmı, degen sual berilgen. Ekspert atta, plakatlar yazılğanda aynı marker ve aynı materiallar qullanılğandırmı degen hususnı da araştırğan. Tabiy ki, mahkemede biz bu ekspertizağa itiraz bildirecekmiz», – dep ikâye etti uquqçı Elvina Semedlâyeva.
«Qırım birdemligi» birleşmesiniñ malümatına köre, dekabrniñ 17-si aqşam saatlarınace Qırımdaki uquqimayecilerine uquqiy yardım isteginen 86 dane rica muracaatı kelgen.
Qırım.Aqiqat olıp keçkenlerni canlı blog vastasınen taqip etecek.
Oktâbrniñ 14-nde Qırımda, Rusiye tarafından ilhaq etilgen yarımadada küç idaresi hadimleri tarafından qırımtatarlar ve musulmanlarğa nisbeten yapılğan repressiyalarğa qarşı bir sıra bir kişilik piketler keçirilgen edi.
Rusiye işğalinden soñ, Qırımda mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
