«Veciye Kaşka işi» figurantları Bekir Degermenci ve Asan Çapuhnıñ advokatları muvaqqat izolâtor (SİZO) hadimleriniñ areketsizligine qarşı Kremlniñ kontroli altında bulunğan Qırım prokuraturasına şikâyet yazdılar. Bunı olar dekabrniñ 14-nde Qırım.Aqiqat muhbirine bildirdiler.
Advokatlar Edem Semedlâyev ve Ayder Azamatov Qırım ve Rusiye ombudsmenlerine muracaat etmek ve İnsan aqları boyunca Avropa mahkemesi (İAAM) reglamentiniñ 39-ncı qaidesine (devlet tarafından, ayatqa, sağlıqqa tüzetilmez, ağır zarar berilmesine ketirecek areketler yapıluvınıñ yasaq etilmesi – QA) binaen acele tedbirlerniñ alınması aqqında ariza bermekni planlaştıralar.
Edem Semedlâyev: «Men cümleden prokuraturağa imayem altında bulunğan şahıs içün böyle ağır neticege ketirgen federal cezalarnı icra etüv hizmeti hadimleriniñ hareketsizligine qarşı bir sıra şikâyetler yazdım. Tünevin men tahqiqatçığa, Bekir Degermenci içün sıñırlav tedbirniñ deñiştirilmesi boyunca ariza berdim. Ondan ğayrı, mevcüt vaziyetke acele surette qarşılıq köstersin deye, bugün İAAMğa muracaat etmege planlaştıram», – dedi.
Advokatnıñ aytqanına köre, Asan Çapuh ale daa Aqmescitniñ SİZOsında buluna. Bir qaç kün evel SİZOnıñ yolbaşçıları Azamatovğa imayesi altında bulunğanını şeerniñ hastahanelerinden birisine plan boyunca avuştıracaqlarına söz berdiler. Advokat bu hususta Qırım prokuraturasına şikâyet yazdı.
«Tıbbiy muayenege qarşı ariza yazmaq isteymiz, çünki onıñ diagnozını öyle de bilmeymiz (SİZOda Çapuhta, tahminen, mikroinsult oldı). Ondan ğayrı, Qırım ve Rusiye ombudsmenlerine şikâyetler yollaycaqmız. İAAM içün de şikâyet azırlaycaqmız», – dedi Azamatov.
Noyabrniñ 23-nde kündüz ilhaq etilgen Aqmescitte telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Rusiye FSBsiniñ Qırım boyunca idaresi yaqalanğan faaliyetçilerni Türkiye vatandaşından «aqsız yerde hususan büyük miqdarda para talap etüv»de qabaatlay.
Noyabrniñ 24-nde Rusiyeniñ kontroli altında bulunğan Aqmescitteki Kyiv rayonı mahkemesi yaqalanğan qırımtatar faaliyetçilerini 2018 senesi yanvarniñ 15-ne qadar apiste qaldırdı.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
