Link açıqlığı

Celâl, faaliyetçiler Çapuh ve Degermenciniñ sağlıqları aqqında: «Biz, öldürilmelerini toqtatmaq kerekmiz»


Nariman Celâl

Qırımtatar milliy areketiniñ faaliyetçisi Nariman Celâl, Qırımdaki Rusiye akimiyetiniñ noyabr 23-nde Aqmescitte yaqalanğan faaliyetçiler Bekir Degermenci ve Asan Çapuhqa qarşı areketleri, «bu adamlarnıñ ayatına qarşı suiqasttır», dedi.

Bunı Celâl Qırım.Aqiqat içün bergen izaatta söyledi.

Celâl: «Olarnıñ (Çapuh ve Degermenciniñ – QA), hususan Bekir Degermenciniñ, ayatı telükeli aldadır. Asan Çapuhnıñ vaziyeti biraz daa yengil, amma onıñ sağlığı içün de kerçek bir telüke bar. Biz olarnıñ öldürilmesini artıq bugün toqtatmaq kerekmiz», – dedi Celâl.

Faaliyetçi, halqara aq-uquq qoruyıcı teşkilâtları, Ukraina ve Rusiye prezidentlerini mevcut vaziyetke diqqat etmege davet etti.

«Olarnıñ (Çapuh ve Degermenciniñ – QA) sağlıq vaziyeti iç kimse içün sır degil edi. Bu sebepten advokatlar eñ başından olarğa ev apisiniñ tayin etilgenini talap ete ediler. Bu eñ çoq. Akimiyet, muayyen memurlar, hususan tevqifni talap etken tahqiqatçı ile bu qararnı alğan ekemniñ areketlerine, bu adamlarnıñ ayatlarına suiqast olaraq qıymet kesem», – dedi Celâl.

Bekir Degermenci dekabrniñ 14-ne keçer gecesinden başlap pek ağır vaziyette reanimatsiya bölüginde buluna.

Noyabrniñ 23-nde kündüz ilhaq etilgen Aqmescitte telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Rusiye FSBsiniñ Qırım boyunca idaresi yaqalanğan faaliyetçilerni Türkiye vatandaşından «aqsız yerde hususan büyük miqdarda para talap etüv»de qabaatlay.

Qırımtatar faaliyetçileriniñ yaqalanuvı esnasında qırımtatar milliy areketiniñ veteranı Veciye Kaşka yaramadı. Adise yüz köstergen yerinden onı «acele yardım» alıp ketti. Daa soñra qadınnıñ vefat etkeni belli oldı.

Noyabrniñ 24-nde Rusiyeniñ kontroli altında bulunğan Aqmescitteki Kyiv rayonı mahkemesi yaqalanğan qırımtatar faaliyetçilerini 2018 senesi yanvarniñ 15-ne qadar apiste qaldırdı.

Dekabrniñ 6-nda Qırım Yuqarı mahkemesi, Degermenciniñ muvaqqat izolâtorda apis etilüvi boyunca qararnı deñiştirmeyip qaldırdı.

Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.

XS
SM
MD
LG