Qırımtatar halqınıñ lideri Mustafa Cemilev, Qırımtatar Milliy Meclisi reisi Refat Çubarov ve onıñ muavinleri İlmi Umerov ve Ahtem Çiygoz OSCEniñ milliy azlıqlar boyunca komissarı Lambert Zannyer ile Qırımdaki vaziyetni ve Ukraina Anayasasına kirsetilecek yarımadanıñ statusına dair deñişmelerni muzakere ettiler.
Bunı Qırımtatar Milliy Meclisiniñ saytı bildire.
Bildirüvde: «Qırımtatar tarafı, işğalci akimiyetniñ qırımtatarlar içün yapqan adımlarınıñ tış körünişini yaratmaq maqsadınen yapılğanlarına ayrıca diqqat çekti. Qırımtatar tiline devlet statusı berilgenine baqmadan onıñ qullanıluv saası kettikçe qısqartıla. Qırımtatarlar reabilitatsiya yerine repressiyalarğa oğradı. Eykellerniñ tiklenmesi artında ise qırımtatar halqınıñ tarihiy variyetini yoq etüv saqlana. Aynı zamanda işğalciler, elverişli qırımtatarlarnı tapıp, Qırımda sahte amanlıq körünişini yaratmağa ögrendiler», – denile.
Qırımtatar icra organınıñ saytı bildirgeni kibi, Ahtem Çiygoz çıqışında, aqiqatta Qırımda «artıq yalıñız insan aqlarınıñ bozuluvı aqqında degil de, terror aqqında söz yürütile», dep qayd etti.
Ondan ğayrı, Meclis liderleri Zannyerge, Ukraina Anayasasındaki «Qırım Muhtar Cumhuriyeti» bölüginiñ 10-ncı qısmı içün deñişmelerni azırlav ketişatı ve azırlanğan metinniñ parametrleri aqqında ikâye ettiler.
Olarnıñ malümatına köre, OSCE Yuqarı Komissarı Ukraina Anayasasına kirsetilecek deñişmelerge dair ekspert hulâsasını bermege azır olğanını bildirdi.
Daa evel Ukrainanıñ Venadaki halqara teşkilâtlarında daimiy temsilcisi İgor Prokopçuk OSCEni, diger halqara teşkilâtlarnıñ ilerici tecribesini qullanıp, işğal etilgen Qırımdaki vaziyetini taqip etmege davet etti.
İyul ayında OSCE Parlament assambleyası, Rusiye vekilleriniñ itirazlarına baqmadan, Ukrainanıñ suvereniteti ve topraq bütünliginiñ tiklenilmesi aqqında qararnı qabul etti.
Bu vesiqada Rusiyeniñ areketleri qatiy şekilde tenqit etilip, Ukraina topraqlarınıñ işğalini toqtatmağa, Ukrainanıñ siyasiy mabüsleri ve rehinlerini azat etmege davet etilmekte. Leyha muzakere etilgende Rusiyeniñ aman-aman bütün vekilleri, Rusiyege qarşı doğrultılğan dep, qarar leyhasına qarşı çıqtılar.
Halqara teşkilâtları, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri oña qarşı bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
