Link açıqlığı

Çiygoz Strassburgda Rusiye eyetini ABPAğa qaytarmaq teşebbüslerine yol bermemege davet etti – Çubarov


Ahtem Çiygoz Strassburgdaki çıqışı vaqtında

Qırımtatar Milliy Meclisi reisi muavini Ahtem Çiygoz Strassburgdaki çıqışı vaqtında Avropa Şurasınıñ Nazirler komitetini, Rusiye eyetine Avropa Birligi Parlament Assambleyasında (ABPA) vekâletlerini qaytarmaq er angi teşebbüslerine yol bermemege davet etti.

Bunı fevralniñ 13-nde Facebookta Qırımtatar Milliy Meclisi reisi Refat Çubarov yazdı.

Çubarov: «Ahtem Çiygoz, Rusiyeniñ Ukrainağa qarşı tecavuzını taqbih etip ve Rusiye işğalcileriniñ qırımtatarlarğa, etnik ukrainlerge ve Qırımda yaşağan diger milletlerniñ vekilleri olğan Ukraina vatandaşlarına qarşı yapqan cinayetlerine oturışuv iştirakçileriniñ diqqatını celp etip, Avropa Şurasınıñ Nazirler komitetini Qırım ve Donetsk ile Lugansk vilâyetleriniñ ayrı rayonları bütünley azat etilmegence Rusiye eyetiniñ ABPAdaki vekâletlerini qaytarmaq içün yapılğan er angi teşebbüslerge qatiyen yol bermemege davet etti», – dep bildirdi.

Onıñ malümatına köre, Çiygoz Komitetniñ oturışuvı esnasında Qırımtatar Milliy Meclisiniñ 2017 senesi dekabrniñ 8-nde qabul etilgen beyanatını oqudı: «Emekdaşlıq ve halqara işbirligine esaslanğan barışıqnıñ pekitilmesi içün epimizge küçlü Avropa Şurası kerek».

Daa evel Qırımtatar Milliy Meclisi, Avropa Birligi Parlament Assambleyasınıñ (ABPA) rehberleri ve azalarına muracaat azırlap, onda Rusiye eyetiniñ Assambleyağa qaytarılmasına yol bermemege davet etti.

Qırımnıñ ilhaqından soñ eyetine qarşı ABPA tarafından sıñırlav tedbirleri qabul etilgen soñ (eyet rey berüv ve onıñ azaları Assambleyanıñ baş olrganlarında çalışuv aqqından marum etildi) Rusiye özü Assambleyanıñ işlerinde iştirak etüvden ve aqımdaki yılnıñ yazında Avropa Birligine azalıq bedeliniñ tölevinden vazgeçti. Moskva, kelecekte böyle sanktsiyalarğa yol bermemek içün ABPAdan reglamentniñ deñiştirilmesini talap ete.

Halqara teşkilâtları, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri oña qarşı bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG