Link açıqlığı

Saatnıñ esas haberi

Rostov mahkemesi Yaltadaki «Hizb ut-Tahrir işi» boyunca birinci oturışuvınıñ kününi avuştırdı


Şimaliy Kavkaz okrugı arbiy mahkemesi dekabrniñ 11-nde Yaltadaki «Hizb ut-Tahrir işi» boyunca azırlıq oturışuvını yanvarniñ 10-na avuştırdı, dep bildire Qırım.Aqiqat muhbiri.

Oturışuv, qabaatlanğanlar Rostov-na-Donu şeerine ketirilmegenler içün avuştırıldı. Olar şimdilik Aqmescitniñ muvaqqat izolâtorında (SİZOsinda) bulunalar.

Oturışuv saat 11:00-ge tayin etildi ve qapalı şekilde ötkerilecek.

Dekabrniñ 4-nde Aqmescitte Rostov okrugınıñ arbiy mahkemesi, seyyar oturışuvında «Yaltadaki Hizb ut-Tahrir işi»niñ figurantları Muslim Aliyev, Emir-Useyin Kuku, Vadim Siruk, Enver Bekirov, Refat Alimov ve Arsen Cepparovnıñ apis muddetlerini 2018 senesi mayısnıñ 27-sine qadar uzattı.

«Yalta altılığı»nıñ işi boyunca tahqiqat işleri bitirildi. Qabaatlanğanlarnı Rostov-na-Donu şeerine yollamaq içün azırlıqlar yapıla.

Yaltadaki «Hizb ut-Tahrir (Rusiye ve onıñ tarafından ilhaq etilgen Qırımda yasaq etilgen teşkilât) işi»niñ fiqurantları Arsen Cepparov ve Refat Alimov 2016 senesi aprelniñ 18-nde Qızıltaşta (Krasnokamenkada) tevqif etilgen soñ apiste bulunalar. Bu iş boyunca qabaatlanğanlarnıñ ilk dörtü 2016 senesi fevralniñ 11-nde tevqif etildi. Bular: İnsan aqları boyunca alâqa grubunıñ azası Emir-Useyin Kuku, qurucılar olaraq çalışqan Aluşta sakini Muslim Aliyev ile Qızıltaş köyüniñ sakini Enver Bekirov ve Yaltada yaşağan çeçek satıcısı Vadim Siruk.

«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi din alâmetine köre yapıla, dep sayalar. Advokat Emil Qurbedinov, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd ete.

Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.

XS
SM
MD
LG