Link açıqlığı

AQŞ Kongressinde Rusiyege qarşı sanktsiyalarnıñ kenişletilmesi uzatılğanı munasebeti ile raatsızlanalar


AQŞ Kongressiniñ Temsilciler meclisindeki demokratlarnıñ fırqa teşkilâtçısı Steni Hoyer, Donald Tramp memuriyetiniñ Kongress tarafından teklif etilgen sanktsiyalarnıñ amelge keçirilmesini uzatqanı munasebetinen memnuniyetsizligini bildirdi. Bunı «Voice of America»nıñ ukrain hizmeti bildire.

Hoyer, içtimaiy ağlarda saylavcılarınıñ suallerine cevap berip: «Men eki fırqadan olğan meslekdeşlerimnen birlikte, Rusiyege qarşı sanktsiyalar boyunca qanunlarnıñ vetonı aşqan sayıda rey çoqluğı ile qabul etilmesi içün pek ağır çalıştım», – dep qayd etti.

Hoyer, «Rusiye sanktsiyaları … Kongress büyük bir ses çoqluğınen «e» dedi, faqat o sesler «habersiz ğayıp oldı»… Neçün­­?» degen sual içün saylavcısına teşekkür bildirdi.

«Qanun, saylavımızğa qarışqanı, Ukrainanıñ şarqında separatistlerge qol tutqanı ve Qırımnı zapt etkeni içün Rusiyege qarşı sanktsiyalarnı kenişlete. (Tramp – QA) memuriyetiniñ, qomşuları ve Qoşma Ştatlarğa qarşı tecavuz etkeni içün Rusiyege bedelini töletmek istemegeni meni pek raatsızlay. AQŞ Maliye nazirligi bu sanktsiyalarnıñ amelge keçirilmesini tolusınen temin etmek ve ittifaqdaşlarımıznı da bunıñ kibi sanktsiyalarnı qabul etmege ve amelge keçirilmesini temin etmege davet etmek kerek», – dep çorlandı siyasetçi.

2017 senesi dekabrniñ 25-nde AQŞ Kongressiniñ Temsilciler meclisi azaları Rusiye, İran ve Şimaliy Koreyağa qarşı sanktsiyalarnı tayin etken qanun leyhasını tasdiqladılar.

Qanun seslerniñ bastırıcı çoqluğınen tasdiqlanğan edi: qanun içün 419 ve qanunğa qarşı 3 ses berildi.

Bu qanun ile, prezident emirlerinen Rusiyeniñ Qırım ilhaqı, Ukrainanıñ şarqındaki areketleri ve Rusiye hakerleriniñ Amerikadaki prezident saylavına qarışmasına qarşı qabul etilgen sanktsiyalar qanuniyleştirile. Amerika kongressmenleri öz qararınen, prezidentni «Rusiye Federatsiyası akimiyetiniñ emiri ile yapılğan ve vatandaşlar, demokratik muessiseler ya da akimiyetlerniñ kibertelükesizligine zarar ketirgen harap etici areketler»ge alâqası olğanı tayin etilgen Rusiye vatandaşlarına qarşı sanktsiyalar qabul etmege mecbur etip, sanktsiya rejimini kenişleteler.

XS
SM
MD
LG