Link açıqlığı

Filistin muhtariyetiniñ yolbaşçısı Qudüs boyunca qarar içün AQŞ prezidenti muavini ile körüşüvini lâğu etti


Filistin muhtariyetiniñ yolbaşçısı Mahmud Abbas, AQŞ prezidenti muavini Mayk Pens ile, onıñ İsrail ziyareti esnasında körüşmeycek. Azatlıq Radiosı bildirgeni kibi, bunı dekabrniñ 9-nda, «Qoşma Ştatlar, Qudüs boyunca qararı ile bütün qırmızı çizgilerini keçtiler» dep, Abbasnıñ yardımcısı bildirdi.

FATH («Filistinni azat etüv areketi») rehberi daa evel AFP içün bergen intervyude, Pensniñ kelgeninden «Filistinde hoşnut degiller», dep bildirdi.

Abbas, Donald Trampnıñ Qudüsni İsrailniñ paytahtı olaraq tanımaq qararı, AQŞnıñ Yaqın Şarqtaki barışıqlı aracı rolüni soñuna irdirdi, dedi.

Mısırda hristian Qıbt ortodoks kilsesiniñ başlığı papa II Tavadros da beanat ile çıqışta bulunıp, AQŞnıñ Qudüs boyunca qararına narazılıq kösterilüviniñ bir ifadesi olaraq Mayk Pensnen körüşmeycegini bildirdi.

«Bu adım millionlarca araplarnıñ duyğularını köz ögüne almay», – denile onıñ beyanatında.

AQŞ prezidenti muavini Mayk Pens Yaqın Şarqqa dekabrniñ 25-ne qadar kelecek, dep beklenilmekte.

Qudüsniñ statusı, İsrail-Filistin çatışmasınıñ eñ duyğulu meselelerden biridir. İsrailliler Qudüsni öz paytahtı sayalar. Filistinliler, Qudüsniñ şarqiy qısmında kelecekte qurulacaq Filistin devletiniñ paytahtı olmaq kerek, dep israr eteler.

AQŞ prezidenti Donald Tramp dekabrniñ 6-nda Vaşingtonda, «Qudüsni resmen İsrailniñ paytahtı tanımağa vaqıt keldi», dep ilân etti.

Ondan ğayrı Tramp, AQŞ Devlet departamentine, AQŞ elçiligini Tel-Avivden Qudüske avuştırmaq içün azırlıqlar başlamaqnı buyurdı.

XS
SM
MD
LG