Link açıqlığı

Saatnıñ esas haberi

Bağçasaraydaki «Hizb ut-Tahrir işi»niñ bütün figurantlarına tevqif 3 ayğa uzatıldı


Aqmescitte Kyiv rayonı mahkemesi, arhiv fotosı
Aqmescitte Kyiv rayonı mahkemesi, arhiv fotosı

Rusiyeniñ kontroli altında bulunğan Aqmescitteki Kyiv rayonı mahkemesi oktâbrniñ 12-sinde Bağçasarayda yaqalanğan «Hizb ut-Tahrir işi»niñ daa üç figurantı – Seyran Saliyev, Memet Belâlov ve Timur İbragimovnıñ apis muddetini üç ayğa uzattı.

Olar muvaqqat izolâtorda martnıñ 9-na qadar qalacaqlar, dep bildire Qırım.Aqiqat muhbiri.

Tahqiqatçı ve prokuror, Saliyev, Belâlov ve İbragimovnıñ apis muddeti soñuna yeteyatqanına baqmadan, tahqiqat areketlerini bitirip yetiştirmegenlerini söylediler.

Advokatlar, sıñırlav tedbirini ev apisine deñiştirmekni talap ettiler.

«Men dört balanıñ babası olam, közden üçünci grup saqatım. Mende yañıçıq bala doğdı, ömür arqadaşım er şeyni bir arada yapıp olamay, nege yapışacağını bilmey», – dedi İbragimov mahkemede.

Seyran Saliyevnıñ dört kiçkene balası bar. Mambet Belâlovnıñ bir balası olğanınan ğayrı o, yaşlı ana-babasını baqa.

Advokatlar, muvaqqat izolâtorda apis etilüvine, qabaatlanğanlarğa tahqiqat tarafından yapılğan tazyıq dep qıymet keseler.

Olar mahkemeniñ bugünki qararına şikâyet bermege planlaştıralar.

Dekabrniñ 6-sında Aqmescitniñ Kyiv rayonı mahkemesi daa üç «Hizb ut-Tahrir işi» figurantı – Ernes Ametov, Marlen Asanov ve Server Zekiryayevğa apis müddetini martnıñ 9-na qadar uzattı.

Oktâbrniñ 12-sinde ilhaq etilgen Qırımda Rusiye telükesizlik hadimleri Bağçasaraynıñ altı sakini – Timur İbragimov, Marlen (Suleyman) Asanov, Memet Belâlov, Seyran Saliyev, Server Zekiryayev ve Ernes Ametovnı yaqaladı. FSB olarnı Rusiye ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.

«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi diniy alâmetine köre yapıla, dep sayalar. Advokat Emil Qurbedinov, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd ete.

Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletleriniñ bir İslam hilâfeti içinde birleştirilmesi, dep köstereler. Lâkin olar buña irişmek içün terroristik usullarnıñ qullanıluvını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni, «terroristik» tanılğan 15 birleşmeniñ cedveline kirsetip, yasaq etti.

Qırımda Rusiyeniñ ilhaqından soñ mustaqil jurnalistler, tsivil faaliyetçiler, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.

XS
SM
MD
LG