Qırım ilhaq etilgenden soñ, Rusiyeniñ repressiyaları ep quvetleşe. Bunı qırımtatar Milliy Meclisi yolbaşçısınıñ muavini İlmi Umerov, dekabrniñ 4-nde Kyivde ötkerilgen «Qırım Rusiye tarafından ilhaq etilgeninden berli yapqan repressiyalar ensiklopediyası» adlı tedqiqatnıñ tanıtuvı esanasında beyan etti, dep bildire Qırım.Aqiqatnıñ muhbiri.
«Qırımdaki insanlar repressiya yuvağını is ete. Dersin ki, pek basit şeyden başlandı. Biz alışıp kelgen tedbirlerniñ keçirilmesi yasaqlandı. Ondan soñ Qırımğa, qırımtatar halqınıñ liderleri Mustafa Cemilev ve Refat Çubarovnı kirsetmey başladılar. Artından cinaiy işler açılıp başladı. Birinciler sırasında – «3 mayıs işi». Ondan soñ, «26 fevral işi»,«Hizb ut-Tahrir işi», 280 maddeniñ birinci qısmına binaen - men, Nikolay Semena ve Kadırov kirgen, ekstremizm boyunca açılğan bir gruppa cinaiy işler», – dey Umerov.
Onıñ sözlerine köre, bu işlerniñ epsi qırımlılarnı qorquzmaq maqsadınen yapıla.
Qırımtatar Milliy Meclisi reisiniñ muavini İlmi Umerov Qırımda eki yıl yaşav tarzındaki koloniyada qaluv cezasına mahküm etilgen edi. Bunıñnen beraber, Umerovğa eki yıl devamında açıq faaliyetnen oğraşması ve kütleviy haber vastalarında çıqış yapması yasaqlandı.Umerov açıq menbalarda yapılğan separatizmge çağıruv yapmaqta qabaatlandı. O, oña qarşı açılğan cinaiy işni, siyasiy maqsatlı iş dep tanıy.
Rusiye akimiyeti, İlmi Umerovnı ve Qırımda mahküm etilgen qırımtatar halqınıñ liderlerinden biri olğan Ahtem Çiygoznı azat etip, oktâbrniñ 25-nde Türkiyege teslim etti. Daa soñra Umerovnen Çiygoz Kyivge keldiler.
Rusiye Qırımnı ilhaq etken soñ, yarımadada mustaqil jurnalistler, cemaat ve qırımtatar milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
