Ukrainanıñ Amnesty International aq-uquq qoruyıcı teşkilâtı, Qırımda dekabrniñ 4-nde Rusiye mahkemesi tarafından tevqifi uzatıla bilecek Qırım aq-uquq qoruyıcısı Emir-Useyin Kukuğa qoltutmaq maqsadınen onlayn tedbirni başladı.
Yarımadada tedbirniñ keçirüv vaqtı 10:00-21:00 (Kyiv vaqtı boyunca 09:00-20:00), dep bildireler aq-uquq qoruyıcıları Facebookta.
«Biz onlayn-furtuna tarzında areket etecekmiz. Oña köre, qısqa vaqıt içinde qullanıcılar aynı heşteg ve davet ile yüzlerce ve biñlerce mesaj yollaylar. İçtimaiy ağlardaki gürülti Emir-Useyinniñ işine diqqatnı celp etmek ve bulunğan yeriñizge baqmadan oña ve ailesine qoltutmañız içün imkân berecektir», – denile bildirüvde.
Aq-uquq qoruyıcıları, içtimaiy ağlardaki öz saifede ya da grupta Emir-Useyin Kukunı azat etmek daveti ile mesajnı yerleştirmege ve #FreeKuku heştegini ilâve etmege çağıralar. Ondan ğayrı Amnesty International Kukunı imaye etmek içün bir ariza imzalamağa davet ete.
Qırımnıñ Yuqarı mahkemesi oktâbrniñ 23-nde ilk basamaq mahkemesiniñ Emir-Useyin Kukuğa apis müddetiniñ 2017 senesi dekabrniñ 8-ne qadar uzatılması boyunca qararını deñiştirmeyip qaldırdı. Apis etilgen Qırım aq-uquq qoruyıcısınıñ ömür arqadaşı Meryem Kuku daa evel onıñ tıbbiy yardımğa muhtac olğanını bildirdi.
Yaltadaki «Hizb ut-Tahrir işi» boyunca qabaatlanğanlar 2016 senesi fevralniñ 11-nde tevqif etildi. Bular: İnsan aqları boyunca alâqa grubunıñ azası Emir-Useyin Kuku, qurucılar olıp çalışqan Aluşta sakini Muslim Aliyev ile Qızıltaş (Krasnokamenka) köyüniñ sakini Enver Bekirov ve Yaltada yaşağan çiçek satıcısı Vadim Siruk.
Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.
Qırımda Rusiyeniñ ilhaqından soñ mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde ketken sayın daa sıq surette tintüvler yapıla.
