Link açıqlığı

Qırım siyasetçisi ve iş adamı Lenur İslâmovnıñ taşılmaz mülki auktsiondan satılıp başlandı. Satıluv neticesinde elde etilecek para, «Qırım qamaçavı» teşkilâtçısınıñ 1,5 milliard rublege yaqın borcu olğan «Sberbank Rossiyi» bankınıñ malı olacaqtır. Qırım.Aqiqat muhbiri, Rusiyede İslâmovnıñ işini nasıl iflâs etilgenini ve mülkünden neler auktsion çöküçi altına kirgenini ögrendi.

Lenur İslâmov – ticariy banklar, naqliyat şirketleri, ticaret ağları, telükesizlik, reklama ve media şirketleri kibi türlü saalarda çalışqan onlarnen şirketniñ saibidir. Evelden işiniñ büyük qısmı Qırımda ve qomşu Rusiyede buluna edi.

2014 senesi aprelinde Lenur İslamov Sergey Aksönovnıñ akimiyetinde baş nazirniñ muavini vazifesine tayin etildi. Bu vazifege o, «qırımtatar halqınıñ yerleştirlmesi ile bağlı ameliy meselelerniñ çezilüvi içün» Qırımtatar Milliy Meclisiniñ temsilcisi sıfatında teklif etilgen edi. Mayısnıñ soñunda Rusiyeniñ kontroli altında bulunğan Qırım parlamenti, İslâmov «ögünde qoyulğan vazifelerni becermege azır olmağanını kösterdi» dep, onı eda etken vazifesinden azat etti.

Yerli akimiyetnen zıddiyet başta işine tesir etmedi. Lâkin 2015 senesiniñ aprelinde Roskomnadzor İslâmovnıñ mediaholdingine kirgen ATR ve Lâle telekanalları ile Meydan ve «Lider» radiostantsiyalarına Rusiyede çalışmaq ruhsetini bermedi. İş adamı, ATRniñ televizion yayınlarını Kyivden kösterecegini bildirip, açıqtan Rusiyeniñ Qırımdaki areketlerine qarşı çıqtı.

Aynı zamanda Rusiye, Qazaqıstan ve Ukrainada maşina distribyuteri olğan onıñ Moskvadaki «Kvingrup» şirketinde problemler peyda oldı. «Petrol Plüs Region» Açıq Anonim Şirketi (OOO), onıñ muflis (bankrot) olaraq tanılmasını talap etip, oña qarşı mahkeme davasını açtı. Davağa 16 kreditor qoşulıp, İslâmovnıñ şirketi olarğa 1,5 milliard ruble borclu olğanını bildirdiler. Bu paradan 1,1 milliard ruble – «Rusiye Sberbankı»nıñ talap etken parasıdır.

2015 senesi dekabriniñ soñunda Moskva vilâyetiniñ Arbitraj mahkemesi Lenur İslâmovnıñ «Kvingrup» Açıq Anonim Şirketini muflis olaraq tanıdı.

Er biri bir buçuq millionlıq eki maşina yeri

2016 senesi yanvar ayında «Sberbank», Lenur İslâmov ve onıñ ömür arqadaşı Elvirağa qarşı mahkeme davasını açıp, olarnıñ muflis tanılğanını talap etti. Maliy muessiseniñ matbuat hizmeti RBK içün bergen izaatında, banknıñ bu yolnen iş adamından borcunı almaq istegenini bildirdi.

Bank, üçünci şahıs tarafından iflâs davası açılğan «Kvingrup» Açıq Anonim Şirketine evelden bergen kreditleri boyunca borclarnıñ keri qaytarıluvı işlerini yapa. Şirketten ğayrı işniñ benefitsiarları olğan İslâmovlarğa da talaplar taqdim etildi. Olarnıñ tarafından vaziyetniñ konstruktiv şekilde al etilmesine dair iç bir teklif alınmadı. Bu sebepten bank, berilgen qanuniy aqqından faydalanıp, 2016 senesi yanvarniñ 28-nde olarnıñ iflâsı aqqında ariza berdi», – dep bildirdi matbuat hizmeti.

2016 senesi iyulniñ 18-nde Moskva Arbitraj mahkemesi Lenur İslâmovnı muflis olaraq tanıdı ve on künden soñ ömür arqadaşı da muflis tanıldı. Mahkeme, mülkleriniñ satılacağına dair qarar berdi. 2017 senesniñ martından başlap, arbitraj idarecisi Aleksandr Korobko İslâmovnıñ beş obyektini auktsionlarğa çıqardı.

Birincisi – Moskvada Maşkova soqağı, 6 adresi boyunca bulunğan ve meydanlığı 149 kv. m. olğan mesken kvartirasıdır. Ondan ğayrı kvartiranen aynı adresi boyunca bulunğan 7-sanlı maşina yeri auktsionğa çıqarıldı. Bu obyektler boyunca auktsionlar eki kere yapıldı – 2017 senesiniñ mart ve aprel aylarında. Lotnıñ başlanğıç fiyatı 47,5 million ruble edi. Faqat auktsionda iştirak etmek içün yeterli sayıda arizalar berilmegeni içün auktsionlarnıñ ekisi de keçirilmedi dep ilân etildi.

Bundan soñ İslâmovnıñ kvartirasını auktsionğa çıqarmadılar. Aynı zamanda kene şu, Moskva, Moşkova soqağı, 6 adresi boyunca bulunğan 17 ve 18-sanlı diger eki maşina yeri satıldı. Olar birinci kere auktsionğa mayısta çıqarılıp, yalıñız noyabrniñ 16-nda satın alındı. Auktsion esnasında lotnıñ fiyatı eki qat eksildi – 3,3-ten 1,6 million rublege qadar. Maşina yerleriniñ ekisini de Murat Bitokov satın aldı.

Beş qat ucuz

Auktsionda İslâmovnıñ eki Qırım obyekti de satıldı. Birincisi – Gurzuftaki sport ve sağlamlaştıruv merkezi. Onıñ umumiy meydanlığı 423,6 kv. m. Lotnıñ başlanğıç fiyatı 106 million ruble edi. Lâkin auktsionnıñ soñuna qadar bu raqam 21 millionğace tüşti yani 5 qat eksildi. Bu fiyatqa Gurzuftaki merkezni iş adamı Konstantin Purim satın aldı.

O, Rusiyeniñ eñ büyük mustaqil naqliyat-logistika holdingi olğan «Sovfraht-Sovmortrans» şirketler grubunıñ saibi Dmitriy Purimniñ doğmuş qardaşıdır. Ağa-qardaş Purimler Moskvada yaşasalar da, ekisi de Qırımda doğdı. Mal-mülkleriniñ bir qısmı Qırımda buluna. Qırımnıñ yalı boyunda olarnıñ «Gurzuf-2013» idariy şirketi çalışa. Onıñ esasçısı, Konstantin Purimdir.

Auktsionda satılğan İslâmovnıñ daa bir taşılmaz mal obyekti – meydanlığı 480 kvadrat metri olğan Aqmescitniñ merkezindeki (Kirov caddesi 74a adresi boyunca bulunğan) ofis meydanı. Auktsionda başlanğıç fiyatı 29 million ruble edi, lâkin neticede o, 14,5 millionğa satıldı. «Maestro audit» şirketiniñ müdiri Natalya Kuskeviç ofis meydanınıñ yañı saibi oldı.

İslâmovnıñ ömür arqadaşı Elvira üzerine yazılğan «Kvinmedia», «Kvinbroker» ve «Krımskaya avtomobil’naya kompaniya» şirketleri de auktsionğa qoyuldı. Arbitraj idarecisi olarnı ağustos ayından berli satacaq ola, lâkin şimdilik auktsionda iştirak etmek içün kimse ariza bermedi.

Qırım.Aqiqat tafsilâtlı izaatlar almaq içün telefon vastasınen Lenur İslâmovğa muracaat etti. İş adamı daa soñra telefon etmege rica etti, amma ondan soñki çañ qaquvlarnıñ iç birisine cevap bermedi. Qırım.Aqiqat ile yazışmalarında o, «işğal etici akimiyetniñ bütün yapqanları qanunsızdır» ve «endi qıtadaki QMC prokuraturası vastasınen halqara mahkemelerde davalar açtım» dep, qısqa beyanatlar ile sıñırlandı.

XS
SM
MD
LG