Link açıqlığı

Saatnıñ esas haberi

Veciye Kaşka: qırımtatar qaraman qadınnıñ ömüri ve ölümi


Veciye Kaşka
Veciye Kaşka

Qırımtatar milliy areketiniñ faali Veciye apte Kaşkanı bile, seve ve ürmet ete ediler.

O, özüni iç bir vaqıt, kimsege begendirmege areket etmey edi – işte, olğanı kibi körüne edi. Özüniñ ayatiy printsiplerinden vazgeçmey, aqsızlıq körgende özüni tutıp olamay, onıñ keskin sözü er vaqıt azır tura edi. Ancaq bunen beraber o pek şaqacı bir insan edi.

Küreşçi ayatı - onıñ ayat tarzı edi

Onıñ tarihı – qırımtatar halqınıñ eyi taqdir oğrundaki küreşiniñ tarihıdır. Onıñ evi uzun yıllar devamında areket faalleriniñ körüşüv yeri olıp turdı. O özü de, ömüriniñ soñunace milliy areket ayatında faal iştirak etip kelgen edi. O,Qırımnıñ vatandaşlıq blokadası aktsiyasında, Kyiv ve Türkiyedeki tedbirlerde iştirak eter edi. Küreşçi ayatı - onıñ ayat tarzı olğanı içün, buña kimse şaşmay edi.

Bu alçaq boylu, arıq qadın iç bir zaman zayıf olıp körünmey edi. Atta tanımağan insanlar bile onıñ turuşında, davranışında, özüne tutma tarzındaiçindeki demir milni, quvetli yaynı köre ediler.

Veciye Kaşka Aqmescitniñ Merkeziy rayon mahkemesi ögünde «26-ncı fevral» işi mahkemesiniñ toplaşuvı esnasında
Veciye Kaşka Aqmescitniñ Merkeziy rayon mahkemesi ögünde «26-ncı fevral» işi mahkemesiniñ toplaşuvı esnasında

Uzun bir müddet Türkiyede tedavi olıp kelgen soñ, ağır hasta olğanına baqmadan, o milliy areket tedbirlerine barıp turdı. Avgust ayında Qarasuvbazar rayonındaki Aq-Qaya eteginde, 1987 senesi Moskvada keçken vaqiqalarnıñ 30-yıllığına bağışlanğan toplaşuvğa rusiyeli küç idaresiniñ hadimleri faallerge tedbirni keçirmege keder etkeninde, o nasıl etip ıncınğanını alâ daa hatırlayım.

Qırımtatarlarınıñ serbestligi içün amansız küreşçi sıfatınen o ebediyen hatırımda qaldı

Felâket onı tuvğan divarları içinde bekley eken. Genç, şırnıqlı ve kelişken bir türk oğlanı, Veciye apteniñ torunınen körüşip turararq, olarnıñ ailesine kire. Tuvğanları ikâye etkenine köre, o tam bir alçaq olıp çıqa – olar toplağan 7 biñ dollarnen beraber, özü de coyılıp ketken.

Veciye apteniñ dostları dolandırıcını, para saiplerine qaytarmasına inandırıp, oña yardım etmege istegenler. Meger türk oğlanı FSBgebağlı eken. Körüşüv yapılacaq yerge silâlı Rusiye küç idaresiniñ hadimleri atılıp kire. Er kesni yerge yatqızalar. Er şey pek tez ve qorqunç bir şekilde olıp keçe.

Mağrur qırımtatar qadınınıñ yorğun ve hasta yüregi böyle bir şokqa dayanıp olamay. Onıñ yüregi yaramay. Bu qadınğa dep, acele yardım maşnası çağırıla, amma hastahanege ketken sırada Veciye apte Kaşka faniy dünyanı terk ete.

O, bir cenkçi kibi yaşap, cenkçi kibi vefat etti. Avtomatlarnıñ namlusınen qarşılaşıp vefat etti.

Artıq o yoqlarğa qarıştı, lâkin qırımtatarlarınıñ serbestligi içün amansız küreşçi sıfatınen o ebediyen hatırımda qaldı. O, ğururlu, samimiy ve serbestlikni sevgen halqnıñ, yeñilemez bir halqnıñ timsallerinden biri olıp qaldı!

Zarema Seitablayeva, qırımlı, bloger (telüke havfından muellifniñ adı ve soyadı deñiştirilgendir)

«Bloglar» rubrikasında bildirilgen fikir-tüşünceler müelliflerniñ noqtaiy nazarını aks ettirip, muarririyetniñ baqışlarınen bir olmaması mumkün.

XS
SM
MD
LG