İlhaq etilgen Qırımda saylanğan Rusiye Devlet Dumasınıñ deputatı Andrey Kozenko Qırımtatar Milliy Meclisine teşkilâtlanğan «cinaiy toplulıq» dedi. Bunı o özüniñ Facebooktaki saifesinde yazdı.
Kozenko, Qırımtatar Milliy Meclisiniñ azalarını Qırımda 2014 senesinden evelki bütün rezonans doğurğan cinayetlerde qabaatlap, olarğa cinayetçiler dedi.
«Aqsız yerde para talap etkenleri içün yaqalanğan Meclis adamları adisesi, menim içün daa bir kere bir fikirni tasdiqladı. Bugün yasaq etilgen «meclis»ke alâqası olğan er angi adam – cinayetçidir. Bu işte iç kimse istisna olamaz. «Meclis» – tamğadır. Çünki cumhuriyetimizde Rusiyeden evelki dönemde topraqnıñ zapt etilüvinden kütleviy qarışıqlıqlarğa qadar milletlerara munasebetleri saasında işlengen bütün rezonanslı cinayetler olarnıñ dögüşçileri ve cinaiy faaliyetlerinen alâqalı ediler», – dep iddia ete deputat
Ondan ğayrı o, Qırımtatar Milliy Meclisine alâqası olğan bütün qırımtatarlarnı cezalav ile qorquza. «Bu teşkilâtnen bağ qurğan er kesni sert ve aqlı bir ceza bekley. Bu yer sizge Ukraina degil – mında qanun ve tertip bar. «Meclis» – teşkilâtlanğan cinaiy toplulıqtır», – dep yaza Kozenko.
Qırımtatar Milliy Meslisi şimdilik bu qabaatlavnı açıq menbalarda izalamadı.
Qırımtatar Milliy Meclisi Rusiye toprağında ve ilhaq etilgen Qırımda Kremlniñ kontroli altında bulunğan Qırımnıñ Aliy mahkemesi qararınen 2016 senesi aprelniñ 26-sında yasaq etildi. Meclisniñ advokatları Rusiyeniñ Aliy mahkemesine appelâtsiya yolladılar, faqat 2016 senesi sentâbrniñ 29-nda o, red etildi.
2017 senesi aprelniñ 19-nda BMT Halqara mahkemesi Ukrainanıñ Rusiyege qarşı davası boyunca ara qararını çıqardı. Bu qararnıñ bir maddesi, Meclisniñ ğayrıdan meydanğa ketirilmesini talap ete.
Noyabrniñ 23-nde kündüz ilhaq etilgen Aqmescitte, Türkiye vatandaşından «aqsız yerde hususan büyük miqdarda para talap etüv»de qabaatlanıp, bir grup qırımtatar faaliyetçileri yaqalandı. Qırım telükesizlik hadimleri yaqalanğanlarnı Qırımtatar Milliy Meclisiniñ azaları olaraq kösterdi.
Mecliste yaqalanğanlarnıñ qırımtatar halqınıñ temsiliy organına alâqasını red ettiler.
