Link açıqlığı

Ukraina Tış işleri nazirligi: Putinniñ Qırımnı ziyaret etmesi, halqara uquqnıñ qaba bir bozuluvıdır


Ukraina – Ukraina Tış işleri nazirligi. Kyiv

Ukraina Tış işleri nazirligi, Rusiye prezidenti Vladimir Putinniñ Qırımnı ziyaret etmesini, Kreml tarafından Ukrainanıñ topraq bütünligi ve halqara uquqı ükümleriniñ qaba şeklinde bozuluvı dep saya.

Bunı noyabrniñ 20-sinde Ukraina Tış işleri nazirliginiñ matbuat hizmeti bildirmekte.

«Qırım Muhtar Cumhuriyeti ve Aqyar bundan evel olğanı kibi, şimdi de dünya tarafından tanılğan sıñırlar içindeki Ukraynanıñ ayrılmaz qısmını teşkil eteler. Rusiyeniñ halqara uquqına zıt kelgen areketlerine defalarca munasip qıymet kesken bütün dünya ülkeleri bunı tanımaqtalar», – denile bildirüvde.

Ukrainanıñ tış işleri muessisesinde, Rusiye tış işleri nazirligine munasip narazılıq notasını yollağanlarını ilâve ettiler.

Açıq menbalarda Rusiye tarafından buña dair izaat berilmedi.

Rusiye prezidenti Vladimir Putin 2017 senesi noyabrniñ 18-nde Yaltadaki Livadiya sarayınıñ toprağında Rusiye çarı III Aleksandr eykeliniñ açıluvında iştirak etti.

Eykelniñ açılış merasimde Putin: «III Aleksandr Rusiyeni seve ve oña inana edi», – dedi. Onıñ aytqanına köre, rusiyeliler Qırımda eykelni açar ekenler, imperatornıñ işleri, yapqanları ve yararlıqlarına aqqını bereler.

Eykel, XIX asırnıñ ekinci yarısında qurulğan ve II Cihan Cenki yıllarında harap etilgen Küçük Livadiya sarayınıñ yerinde qoyuldı, dep bildirile.

Qırımtatar Milliy Meclisiniñ reisi Refat Çubarov, Ukraina toprağınıñ bütünligi dünya tarafından tanılğan sıñırlar içinde tiklenilgen soñ, Qırımda ilhaqtan soñra qoyulğan bütün eykeller bir afta içinde yıqtırılacaqlar, dedi.

Ukrainanıñ Yuqarı Radası 2014 senesi fevral 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko münasip qanunnı imzaladı. Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.

XS
SM
MD
LG