Link açıqlığı

Boris Zaharov: Qırımnıñ azat etilüvi «imkânı olğanı qadar qan tökülmeden» keçmek kerek


Ukraina Helsinki insan aqları şurasınıñ yolbaşçısı Boris Zaharov

Qırımnıñ azat etilüvi insan aqları esapqa alınğan şekilde «imkânı olğanı qadar qan tökülmeden» keçmek kerek. Böyle bit fikirni noyabrniñ 17-nde, Qırım.Aqiqat Radiosında keçken «Kündüzki şou» efirinde Ukraina Helsinki insan aqları şurasınıñ yolbaşçısı Boris Zaharov beyan etti.

«İşğal etilgen topraqlarnı azat etüv – bir dane qurşun atılmağan taqdirde bile, arbiy bir operatsiya sayıla. Çünki anda Ukraina bayrağını köterip, ordunı kirseterek, o topraqlarnı nezaret altına almalı. İmkân olğanı qadar onı qan tökmeden ve insan aqları esapqa alınğan şekilde keçirmek kerek», – dep ayttı Zaharov.

Onıñ qayd etkenine köre, Minsk añlaşmalarında Qırım aqqında söz yürsetilmegeni sebebinden, yarımadanıñ azat etilüvi, BMT (OON), Avropa parlamenti ve ABD iştirak etken başqa bir seviyelerde çezile.

Noyabrniñ 14-nde New-Yorkta keçken BMT (OON) Baş Assambleyası Üçünci komitetiniñ toplaşuvında işğal altındaki Qırımda insan aqlarınen bağlı qararınıñ yañartılğan leyhası qabul etilgen edi.

Qarar leyhasını Ukraina BMT (OON) Baş Assambleyası Üçünci komitetiniñ kâtibiyetine 2017 senesi oktâbr ayında taqdim etken edi. Anda Rusiyeden BMT (OON) Halqara Adalet Mahkemesiniñ Qırımda qırımtatar halqınıñ Milliy Meclisi yasağınıñ lâğu etilmesi, yarımadada ukrain ve qırımtatar tillerinde tasil alınuvı teşkil etmesinen bağlı muvaqqat tevsiyeler yerine ketirilmesi talap etilgen edi.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, onı «tarihiy adaletniñ tiklenmesi» dep adlandıra.

XS
SM
MD
LG