Link açıqlığı

Faaller gece Qarasuvbazar rayonında evniñ qurşunğa tutulmasını «qorquzuv areketi» dep saya


Cafer Ametov qurşunğa tutuv vaqiasından soñ öz azbarında, 2017 senesi noyabrniñ 16-sı

Qırımtatar faalleri Qırımnıñ Qarasuvbazar rayonı Qışlav (Kurskoye) köyü sakini Cafer Ametovnıñ eviniñ qurşunğa tutulmasını, «qorquzuv areketi» dep sayalar. Bu aqta Qırım.Aqiqatqa qırımtatar faali Zair Smedlâyev ikâye etip berdi.

«Maqsat - ondan ğayrı, qomşularını da qorquzmaq. Bunı yapqanlarnıñ ince esapları bar, olar cevapkârlıqqa çekilmeyceklerini bileler, çünki «mevtanı cıyma aqqına saip organları» qırımtatarlarınen bağlı cinayetlernen pek de oğraşmay demek mümkün. Kimse Reşat Ametovnıñ qatillerinen, Ervin İbragimov hırsızlarını tapmadı», – dep qayd etti Smedlâyev.

Faal ikâye etkenine köre, Rusiye Qırımnı ilhaq etmesinden evel, Ametov üç kere yerli şura deputatı ve yerli Meclis azası olğan eken.

«O, musbet insan, lâkin şimdi o pek faal birisi dep olamam ve mesele siyasetnen bağlı degildir, dep belleyim», – dey Qırım.Aqiqatqa Qırım insan aqları bağ gruppasınıñ koordinatorı Abdureşit Cepparov.

Faaller bildirgenine köre, politsiya hadimleri evelden ücüm etken insannıñ kimligini tapqan ve tüfekten atqan şahıs, zarar körgen faalniñ köydeşi eken. Atılğan qurşunlardan araba qapu, kiriş qapusı, evniñ duvavları ve araba zarar körgen, amma zararlanğan insanlar yoq.

Rusiye Qırımnı ilhaq etken soñ, FSB yarımadada muntazam surette insanlarnı tutıp ala, tintüvler keçire, mustaqil jurnalist, qırırmtatar faalleri, muallefet ve Ukraina tarafdarı olğan cemaat erbapları ve diniy azınlıqlarnı teşkil etkenlerni sorğulay. Uquq qorçalayıcılar rusiyeli küç hadimleriniñ işbu areketlerini siyasiy ceetke esaslı dep tanıy.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, onı «tarihiy adaletniñ tiklenmesi» dep adlandıra.

XS
SM
MD
LG