Link açıqlığı

BMT-de Qırımğa dair qararnıñ yañartılğan leyhası qabul etildi


Noyabrniñ 14-nde Nyu-Yorkta BMT Baş assambleyası Üçünci komitetiniñ meclisinde ilhaq etilgen Qırımda insan aqlarına dair qararnıñ yañartılğan leyhası qabul etildi.

Rey berüvniñ neticesinde 71 ülke vesiqanıñ qabul etilmesine qoltuttı, 25 ülke qarşı çıqtı ve 77 ülke rey bermedi.

Nyu-Yorktaki Ukraina eyetiniñ terkibinde bulunğan Ukraina tış işleri naziriniñ muavini Serhiy Kyslytsya, BMT Baş assambleyası Üçünci komitetiniñ meclisinde, Rusiyeniñ Qırımda işğal etken devlet mecburiyetlerini bozmağa devam etkenini bildirdi. Onıñ aytqanına köre, Qırım sakinleri ekstremist, terrorist ya da Ukrainanıñ casusı dep ilân etilmesinden qorqalar, çünki bu olar içün cinaiy taqip manasına kele.

Rusiyeniñ vekili vesiqanı «kerçek ayatqa alâqası olmağan» ve Ukrainanıñ nevbetteki bir «Qırımda referendum neticesinde qabul etilgen halqnıñ qararına» rağmen Qırımnıñ statusını deñiştirmek teşebbüsi dep adlandırdı.

BMT Baş assambleyasınıñ meclisine kelgen Ukrainanıñ eyetini, aralarında Ukraina halq deputatı Mustafa Cemilev de olğan Qırımtatar Milliy Meclisiniñ azaları, Ukrainanıñ diplomatları ve uquqqoruyıcıları teşkil eteler.

Ukraina, Qırımda insan aqlarına dair qararnıñ yañartılğan leyhasını BMT Baş assambleyası Üçünci komitetiniñ kâtipler eyetine 2017 senesiniñ oktâbrinde teslim etti. Vesiqada Rusiyeden BMT Halqara mahkemesi tarafından Qırımda Qırımtatar Milliy Meclisinden yasaqnıñ alıp taşlanmasına dair tevsiye etilgen muvaqqat tedbirlerniñ ömürge keçirilmesi ve yarımadada ukrain ve qırımtatar tillerinde tasil aluvnıñ temin etilmesi talap etile.

Ukrainanıñ Yuqarı Radası 2014 senesi fevral 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko münasip qanunnı imzaladı. Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.

XS
SM
MD
LG