Noyabrniñ 6-nda ilhaq etilgen Qırımda yarımadanıñ Rusiye tarafından ilhaqını qanuniyleştirmek içün «Qırım dostları» birleşmesi meydanğa ketirildi. Rusiyeniñ TASS haber agentligi bildirgeni kibi bu, Rusiyege tabi akimiyet tarafından teşkil etilgen «Zemaneviy halqara munasebetleri noqtai-nazarından Qırım. Qırım dostlarınıñ forumu» konferentsiyasınıñ neticesidir.
Haber agentligi, konferentsiya iştirakçileri Ğarp tarafından «2014 senesi referendumı ve Qırım halqınıñ öz kelecegini özü tayin etmek aqqı qanuniy» tanılmaları içün ğayret köstermek kerekligi hususında qarar berdiler ve bu sebepten birleşme meydanğa ketirildi, dep daa tafsilâtlı malümat bermekte.
Rusiyege tabi akimiyet, konferentsiyağa 30 ülkeniñ vekilleri keldi, deye iddia ete.
Yañı teşkilâtnıñ qurucıları, işbirligini «halq diplomatiyası usulları»nen yapmaq niyetindeler.
Noyabrniñ 6-sında Yaltada «Qırım dostlarınıñ forumı» açıldı. Tedbir Livadiyada ötkerile. Kremlniñ kontroli altında bulunğan Rusiye Devlet dumasındaki Qırım vekili Mihail Şeremet bildirgen malümatqa binaen yarımadağa 90-ğa yaqın çetel musafiri keldi.
2014 senesi martnıñ 16-sında Qırım ve Aqyar şeeriniñ territoriyasında yarımadanıñ statusına dair dünya tarafından qanuniy olaraq tanılmağan referendum ötkerilip, neticesinde Rusiye Qırımnı öz toprağına ilhaq etti. Referendumdaki rey berüvniñ neticelerini ne Ukraina, ne Avropa Birligi, ne de AQŞ tanıdı. Martnıñ 18-nde Rusiye prezidenti Vladimir Putin Qırımnıñ Rusiyege «öz isteginen qoşulğanını» ilân etti.
Ukrainanıñ Yuqarı Radası 2014 senesi fevral 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko münasip qanunnı imzaladı. Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña “tarihiy adaletniñ tiklenmesi”, dey.
