Link açıqlığı

Saatnıñ esas haberi

Siyasetşınas: Qırımda saylav sisteması – «demokratik protseduralarnıñ immitatsiyasıdır»


Qırım siyasetşınası Yevgeniya Gorünova, Rusiyeniñ devlet sisteması demokratik protseduralarnıñ immitatsiyası üzerinde qurulğan olıp, şimdi onı ilhaq etilgen Qırımda da közetmek mümkündir, dep saya. Bu fikirni o, Qırım.Aqiqat Radiosınıñ efirinde Rusiye tarafından Yaltada yañı belediye başlığınıñ tayinlenmesini yorumlağanda söyledi.

«Bugünki Rusiyede adamlarnı akimiyetke yaqın bile qoymaylar, demokratiyanıñ illüziyasını ise prezident ve parlament saylavları vastasınen doğuralar. Yerli yolbaşçılarğa kelgende olarnı, vatandaşlar saylap da soñundan esabat sorap olamasınlar dep, ya yuqarıdan, ya da konkurs neticesinde tayin eteler. Bu, umumen devlet siyasetiniñ bir qısmı ve Qırım da bundan istisna degildir. Yaltada umumiy rey berüvniñ qullanılacağına pek şübelenem, çünki bu ziyadesinen iştaa qozğatqan bir yer parçasıdır. Moskvağa yazılğan şikâyetlerniñ bir şey deñiştire bileceğini iç de tüşünmeyim: anda yerli davalarnen kimseniñ işi yoq», – dep qayd etti siyasetşınas.

Oktâbrniñ 31-nde şeer memuriyetiniñ yolbaşçısı vazifesini eda etken Yelena Sotnikova Yaltada Rusiye tarafından tayinlengen belediye başlığı oldı. Kremlniñ kontroli altında bulunğan şeer şurasınıñ deputatları oña rey berdi, amma aynı zamanda konkursnıñ keçirilmesini vaqtınca toqtatqan mahkeme qararına iç bir emiyet bermediler. Mahkemede davanı açqan kişi, konkursta iştirak etüvden çetlendirilgen Aqyar sakini Viktor Litvinov edi.

2007-de sabıq şeer yolbaşçısı Andrey Rostenko istifa etken soñ Yalta belediye başlığınıñ yeri boş edi.

Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ vaqtınca işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko münasip qanunnı imzaladı. Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Garp ülkeleri bir sıra iqtisadiy sanktsiyalar qullandı. Rusiye yarımadanıñ işğalini red etip, oña “tarihiy adaletniñ tiklenmesi”, dey.

XS
SM
MD
LG