Türkiye prezidenti Recep Tayyip Erdoğan oktâbrniñ 26-sı, cumamaqşamı künü Ankarada azat etilgen qırımtatar halqınıñ liderleri Ahtem Çiygoz ve İlmi Umerovnen körüşti. Bu aqta Qırımtatar halqı Milliy Meclisiniñ reisi Refat Çubarov Facebookta bilidire.
Onıñ bergen malümatına köre, körüşüv Türkiye przidentiniñ Aq Saray resmiy rezidentsiyasında ötkerilgen.
«İlmi Umerov ve Ahtem Çiygoz prezidentke olarnıñ azat etilmesinde köstergen ğayretleriiçün minnetdarlıq bilidirip, oña Qırımda qanunsız şekilde taqip etilgen, apiske alınıp mahküm etilgen onlarnen qırımtatarları, ukrainler ve diger millet vekilleriniñ azat etilmesinde yardım etmesini rica etkenler», – dep yaza o.
Cevap olaraq Erdoğan, hususan Ukrainanı ziyaret etkeninde de bir daa körüşeceklerinden emin olğanını bildirgen.
İşğal altındaki Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerov oktâbrniñ 25-nde teslim etildi.
Ukraina prezidenti Petro Poroşenko oktâbrniñ 25-nde, Türkiye Cunhuriyetiniñ prezidenti Recep Tayyip Erdoğannı Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerovnıñ azat etilmesinde ğayret köstergeni içün teşekkür bildirdi.
Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etip, eki yıl devamında açıq faaliyetnen oğraşması ve kütleviy haber vastalarında çıqış yapmasını yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.
Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alınğan edi. Qırımnıñ rusiyeli akimiyeti Çiygoznı kutleviy nizamsızlıqlar teşkil etmekte qabaatlay.
