İşğal altındaki Qırımda qırımtatarlarıı olarnıñ liderleri Ahtem Çiygoz ve İlmi Umerovnıñ azat etilmesini quvançnen qarşıladı, lâkin «olarnı qanunsız şekilde vatanlarından marum etkenleri içün muayyen bir qayğı bar». Oktâbrniñ 26-nda Qırım.Aqiqatqa bergen izaatında, qırımtatar milliy areketiniñ faali Nariman Celâl böyle bir fikir beyan etti.
«Qırımtatarlarınıñ ekseriyeti ictimaiy ağlar ve doğrudan telefon vastasınen biri-birini tebrik etken edi: iç olmağanda eki siyasiy mabüs azatlıqqa qavuştı. Temelli bir malümat olmasa da, er kes olarnı vatanından marum etkenleri aqqında aytmaqta. Bilgenime köre, ekisi de Qırımğa kirmege areket etip baqacaqlarını ayttı. Ancaq büyük ihtimal kirişlerini yasaqlağan gizli qarar bar. Eki qırımtatarı vatanından marum etilgeni hususınen bağlı muayyen bir qayğı bar. Lâkin olarnıñ azat etilgeninen bağlı quvanç, bu meseleni bastırıp keçe», – dedi Celâl.
İşğal altındaki Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerov oktâbrniñ 25-nde teslim etildi.
Ukraina prezidenti Petro Poroşenko oktâbrniñ 25-nde, Türkiye Cunhuriyetiniñ prezidenti Recep Tayyip Erdoğannı Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerovnıñ azat etilmesinde ğayret köstergeni içün teşekkür bildirdi.
Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etip, eki yıl devamında açıq faaliyetnen oğraşması ve kütleviy haber vastalarında çıqış yapmasını yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.
Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alınğan edi. Qırımnıñ rusiyeli akimiyeti Çiygoznı kutleviy nizamsızlıqlar teşkil etmekte qabaatlay.
