Avropa Şurası Parlament Assambleyasınıñ prezidenti Rusiyeden Qırımtatar Milliy Meclis yasağınıñ lâğu etilmesine çağırdı. Bu aqta PASEniñ saifesindeki beyannanmede söz yürsetile.
«Qırımtatar milliy areketiniñ liderleri Ahtem Çiygoz ve İlmi Umerovnıñ azat etilgenine quvanam. Olar qırımtatar cemaatçılığınıñ muim ve ananeviy strukturası olğan Milliy Meclis azaları olğanı sebebinden, olarnıñ azat etilüvi doğru yönelişte atılğan bir adımdır. Bu eki lider azat etilgen soñ, başqaları da azat etilecegine ümüt besleyim.Ayrıca men Rusiye akimiyetini Qırımtatar halqı Milliy Meclisine nisbeten kirsetken bütün yasaq ve sıñırlamalarınılâğu etmesine çağıram», – dedi Kiriakides.
İşğal altındaki Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerov oktâbrniñ 25-nde teslim etildi.
Ukraina prezidenti Petro Poroşenko oktâbrniñ 25-nde, Türkiye Cunhuriyetiniñ prezidenti Recep Tayyip Erdoğannı Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerovnıñ azat etilmesinde ğayret köstergeni içün teşekkür bildirdi.
Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etip, eki yıl devamında açıq faaliyetnen oğraşması ve kütleviy haber vastalarında çıqış yapmasını yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.
Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alınğan edi. Qırımnıñ rusiyeli akimiyeti Çiygoznı kutleviy nizamsızlıqlar teşkil etmekte qabaatlay.
Kreml nezaretindeki Qırım Yuqarı mahkemesi 2016 senesi aprelniñ 26-nda Rusiye territoriyasınen işğal altındaki Qırımda Qırımtatar Meclisiniñ faaliyetini yasaqlağan edi. Bu qararnı lâğu etilmesi içün uquq qorçalayıocılar Rusiye Yuqarı mahkemesi şikâyet yollağan edi, ancaq şikayet 2016 senesi sentâbrniñ 29-nda red etilgen edi.
2017 senesi aprelniñ 19-nda Birleşken Milletler Teşkilâtınıñ Halqara mahkemesi Ukrainanıñ Rusiyege qarşı açqan davasında muvaqqat qarar qabul etken edi. Gaagadaki mahkeme, Kyiv talap etken terrorizmge maddiy destekniñ berilmesine qarşı Halqara añlaşma esasında Rusiyeni muvaqqat tedbirlernen cezalamağa razı olmadı. Amma Moskva qırımtatarlarnıñ ve etnik ukrainlilerniñ aqlarını sıñırlamaqtan vazgeçmege, Meclisniñ faaliyetini devam ettirmege ve istilâ etilgen Qırımda ukrain tilinde tasil berüvni tiklemege mecbur etildi.
