Qırımdan Türkiye Cumhuriyetine teslim etilgen qırımtatar milliy areketiniñ liderleri Ahtem Çiygoz ve İlmi Umerov hususiy sefernen Ankarağa yetip bardılar, dep bildire Qırım.Aqiqatqa Ukraina haber siyaseti naziriniñ birinci muavini Emine Ceppar.
Onıñ sözlerine köre, şimdilik Çiygoz ve Umerov Kyivge ne vaqıt kelecekleri aqqında iç bir şey belli degil.
«Olar Türkiyede musafir sıfatındalar. Tahminimizge köre, olarğa tibbiy tedqiq keçmeleri teklif etilecek, lâkin olar buña razı olurmı, yoqmı, bilmeymiz. İşte, olarnıñ bu sebepten Kyivge şimdi ya da bir qaç künden soñ kelicekleri buña bağlı», – dep ikâye etti Emine Ceppar.
O, qırımtatar liderleriniñ Türkiye tarafına teslim etilip, bütün qabaatlavları alıp taşlanması, Ukraina prezidenti Petro Poroşenko diger devletlerniñ liderlerinen körüşüv esnasında qırımlı siyasiy mabüslaırnen bağlı meseleni devamlı kötergeni bir pretsendent olaraq, azat etilmelerine bir imkân doğurğanını da qayd etti.
«Biz bu esnas toqtamaycağına inanmaq isteymiz», – degen sözlerni ilâve eterek, Ukrainada qırımlı siyasiy mabüslarnıñ azat etilüvi devam etilecegine inanılğanını qayd etti.
İşğal altındaki Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerov oktâbrniñ 25-nde teslim etildi.
Ukraina prezidenti Petro Poroşenko oktâbrniñ 25-nde, Türkiye Cunhuriyetiniñ prezidenti Recep Tayyip Erdoğannı Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerovnıñ azat etilmesinde ğayret köstergeni içün teşekkür bildirdi.
Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etken edi. Bunıñnen beraber, Umerovğa eki yıl devamında açıq faaliyet ile oğraşması ve kütleviy haber vastalarında çıqış yapması yasaqlanğan edi. Rusiyeli prokuror İlmi Umerovnı 3 yıl ve 6 ay müddetlik şartlı surette azatlıqtan marum etilmesini, oña 3 yıllıq sınav müddeti tayin etilmesini ve üç yıl devamında cemaat faaliyetinen beraber ocalıq yapmasınıñ yasaqlamasını talap etken edi.Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.
Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 8 yıllık koloniya cezasına mahküm etken edi. Çiygoznıñ özü çıqarılğan ükümni Aqmescit SİZOsında bulunaraq videobağ vastasınen diñlegen edi.
Ahtem Çiygoz 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alınğan edi. O zaman miting iştirakçilerine qarşı Rusiye, şu cumleden «Russkoye yedinstvo» firqası tarafdarları olğan faaller qarşı çıqqan edi. Qırımnıñ rusiyeli akimiyeti Çiygoznı kutleviy nizamsızlıqlar teşkil etmekte qabaatlay.
Rusiyeli mahkeme «Çiygoznıñ davası» iyülniñ 20-nde keçirilgen qapalı mahkeme toplaşuvından soñ, bu dava – qırımtatar Meclisi yolbaşçısınıñ muavini Ahtem Çiygoz ve davanıñ diger iştirakçileri olğan Ali Asanov ve Mustafa Degermenci olaraq ekige bölüngen - «26 fevral davası» çerçivesinde baqqan edi.
