Link açıqlığı

Qırımda tutulğan bir kişilik piket iştirakçileriniñ ekseriyeti serbest bıraqıldı – «Qırım birdemligi»


Oktâbrniñ 14-nde işğal altındaki Qırımda yarımadada rusiyeli küç hadimleriniñ repressiyalarına qarşı yapqan bir kişilik piketleri içün tutulıp alınğan iştirakçiler, politsiya tarafından serbest bıraqıldı. Bu aqta Facebook ta «Qırım birdemligi» bildirmekte.

Böylece, Aqmescit, Canköy, Kefe, İslâm-Terekte tutulıp alınğan piket iştirakçileri serbest bıraqılğanı aqqında belli oldı.

Faaller yañartqan malümatqa köre, bütün kün devamında rusiyeli küç hadimleri Qırımda bir kişilik pikette iştirak etken 34 kişini tutıp alğan. Bu arada da bu areketler qanunğa zıt kelgen şekilde yapılğan (tutlğan kişilerge olarnıñ aq uquqları aqqında malümat berilmegen, advokat qullanma aqqı tanılmağan, zorbalıqnen parmaq izleri alınğan), dep qayd ete«Qırım birdemligi»niñ temsilcileri.

Tutulğan faaller politsiya hadimleriniñ aqsız areketleri ve aq-uquqları bozulğanı aqqında şikâyetler yaza, dep bildire faaller ve qırımlı advokat Rustem Kâmilev.

Oktâbrniñ 14, cumaertesi künü, Rusiye işğal etken bütün Qırım boyunca, yarımadada rusiyeli küç hadimleriniñ, husussan qırımtatarları, Qırım musulmanlarına yapılğan repressiyalarına qarşı bir kişilik piketlerge onlarnen insan çıqqan edi. «Qırım birdemligi»niñ malümatına binaen, piketlerde 100-den ziyade insan iştirak etken, 30-dan ziyadesi tutulıp politiya idarelerine alıp ketilgen.

Rusiyeli küç idareleri bu hususta er angi bir açıq izaat bermedi.

Qırım Rusiye nezaretine keçkenden soñ, FSB yarımadada muntazam surette tintüvler keçire, jurnalist, faaller, cemaat erbapları sorğulay, qırımtatar vatandaşları tutulıp ala. Uquq qorçalayıcılar bunı «farqlı tüşüngenlerge qarşı küreş» dep tanıy.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG