Link açıqlığı

Saatnıñ esas haberi

Qırım akimiyeti qırımtatar abideleriniñ saqlanmasına para masraf etmege istemey - faal


İşğalden soñ Han sarayda yapılğan muvafaqiyetsiz restavratsiya işleri Qırımnıñ rusiyeli akimiyeti qırımtatarlarınıñ medeniy abideleri saqlanmasına bücet paralarını masraf etmege istemegenlerini köstermekte, dep bildire qırımlı faaal Ayvaz Osmanov. Böyle bir fikirni o Qırım.Aqiqat Radiosı efirinde bilidirdi.

«Han camisiniñ qubbesi yıqılıp başlağanda, muzey onı öz esabına tamir etebile edi, lâkin federal maqsatlı programmanıñ şartlarına bazanaraq, olar muzey yolbaşçılarına er angi bir şey yapmasını yasaqladı. Mesele tap, içerde qubbeni tutacaq bir tireme qoyılmasına qadar alıp bardı, atta bu konstruktsiya bile 100 biñ ruble tuttı. Artıq camide ibadet keçirmege çare yoq. Zanımca, rusiyeli akimiyet bizim abidelerimizniñ saqlanmasını istemey: qırımtatarlarına bermemek içün olar paralarnı añlaşılmağan bir sürü şeyge masraf eteler», – dep qayd etti o.

Bağçasaraydaki Han saray Sudaqtaki Ceneviz qalesi, Qırım astrofizika observatoriyası, Manğup-Qale, Eski-Kermen, ve Çufut-Qalenen bir sırada UNESCO Halqara miras cedveline kirsetilecek abidelerden biridir.

UNESCO general müdüriniñ yardımcısı Eric Falt sentâbrniñ 21-nde, teşkilâtnıñ vekâleti olğan saalarda Qırımdaki vaziyetniñ doğrudan yapılacaq monitoring mehanizminiñ parametrleri işlenip çıqarılması boyunca mesleatlaşuv etapı bitecek seviyege keleyatqanını bilidrgen edi.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG