Link açıqlığı

Cemilev Strazburgta: Qırımda, istilânıñ ilk künlerinden başlap, serbest matbuat yoq etile


Qırımtatar halqınıñ lideri Mustafa Cemilev Strazburgta, Avropa Şurası Parlament Assambleyasınıñ toplaşuvı çerçivesinde ötkerilgen yan-tedbir devamında istilâ etilgen Qırımda söz serbestliginiñ yoq etilüvi aqqında tarif etti.

«İlk kününden başlap bütün serbest matbuat yoq etilmekte. Rusiye, kütleviy haber vastalarınıñ cümlesini öz nezaretine aldı. Öz serbestligini qorçalamağa tırışqanlar ise – ya qapatıldı, ya da Qırımnı terk etti», – dedi Cemilev.

Merasimde iştirak etken Qırımtatar Milliy Meclisi azası, «Hayat» radiosınıñ muarriri Gayana Yüksel, yarımadada Kremge tabi olğan akimiyet tarafından Qırımdaki jurnalislerge qarşı yapılğan basqı aqqında tarif etti.

«Akimiyet, o yerde (Qırımda – QA) serbest KHV yoq etilsin dep, elinden kelgenini yaptı. Qırımlı jurnalistlerge qarşı repressiyalar başlatıldı... Soñra haber vastaları qapatılıp başlandı... Nevbetteki basamaq – serbest ve mustaqil müellifler olaraq sadece olıp keçken adiselerni qayd etmege tırışqanlarnıñ ezilmesi», – dedi Yüksel.

O, dünya cemaatına muracaat etip, insan aqlarınıñ ve KHV serbestliginiñ bozuvlarını taqip etmek içün nezaret eyyetini Qırımğa yollamağa rica etti.

Qırımlı jurnalist Anna Andriyevska, Qırımda rus mahkemesinde «fikiri sebebinen mahküm etilgen» başqa qırımlı jurnalist Nikolay Semena aqqında tarif etti.

«Qırımnıñ aitligini muzakere etmek – bügün Rusiye qanunlarında cinayet olaraq tanıla... Bügün bu sebepten Qırımda bir sıra jurnalistler ve cemaat erbapları taqip etilmekte, olardan biri – Nikolay Semena. O öz fikiri içün mahküm etilgen», – dedi Anna Andriyevska.

Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket faalleri, Meclis azalarınıñ evlerinde tintüvler sıqlaştı.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG