Link açıqlığı

Bağçasarayda tintilgen evler yanında failler yaqalandı – «Qırım birdemligi»


Bağçasarayda rus silâlı hızmetçiler eñ azından 8 adamnı yaqalağan. Olar tintüvler olıp keçken evlerniñ yanına kelgen edi. Bunı Qırım.Aqiqatqa «Qırım birdemligi» birleşüviniñ koordinatorı Dilâver Memetov haber etti.

«Tintüvler vaqıtında destek bildirmek içün azbarda toplaşqan adamlar da tutılğan. Marlen Asanovnıñ evi yanında – beş adam, daa üç adam – Seyran Saliyevniñ evi yanında. Olar yerli politsiya bölügine alıp ketilmek kerek edi», – dedi Memetov.

Rus haber vastaları, Rusiye Federal telükesizlik hızmetiniñ (FSB) matbuat hızmetine atıf etip, Qırımda silâlı hızmetler Rusiyede ve onıñ işğaline oğrağan Qırımda yasaq etilgen«Hizb ut-Tahrir» teşkilâtınıñ Bağçasaraydaki üceyresini yoq etkenlerini haber etti.

Oktâbrniñ 11-nde, çarşenbe künü, saba Bağçasarayda rus silâlı hızmetleri bir-qaç qırımtatarınıñ, musulmannıñ evinde tintüv keçirgeni malüm oldı.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı dep saya. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleridir.

«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek oğrunda terroristik usullarnı red ete ve Rusiyede adaletsizce taqip etilgenini aytalar. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etken edi.

XS
SM
MD
LG