Türkiye prezidenti Recep Tayyip Erdoğan oktâbrniñ 9-nda resmiy ziyaret ile Kyivge kelip çıqtı. Erdoğannıñ ziyaret esnasının yayını, Ukraina prezidenti Petro Poroşenkonıñ ictimaiy ağlardaki Facebook saifesinde yapılmaqta.
Ukraina prezidenti Memuriyetiniñ matbuat hızmeti bildirgenine köre, ziyaret esnasında Türkiye-Ukraina Strategik Şurasınıñ altıncı toplaşuvı ötkerilecek.
Erdoğan Ukraina Yuqarı Radası yolbaşçısı Andrey Parubiy, baş nazir Vladimir Groysman ve Ukrainadaki türk cemaatçılığınıñ temsilcilerinen körüşmege planlaştıra.
«Ukraina ile strategik işbirlikniñ devamlı ilerilemesi içün yañı yöñelişler muzakere etilecek, bu hususta çeşit vesiqa ve protokollar imzalanacaq» – denilmekte haberde.
Ukrainanen yapılacaq strategik işbirlik planları muzakeresi etilecegi aqqında Türkiye prezidentiniñ saytı da bidirmekte. Türkiye tarafınıñ haberinde, ziyaret esnasında taraflar işğal altındaki Qırım ve yarımadadaki qırımtatarlarınıñ vaziyetinen bağlı fikir alış-verişi yapılacağı aqqında yazılmaqta.
Poroşenko ve Erdoğan bu yıl sentâbr ayınıñ soñunda BMT Genassambleyasınıñ toplaşuvında körüşken ediler. İşte o zaman Türkiye lideri ukrain meslekdeşinen al-azırdaki ziyaret planlarını muzakere etip, Türkiye Ukrainanıñ mustaqilliginen dünyaca tanılğan sıñırları içindeki topraq bütünligine qol tutqanını tasdıqlağan edi.
