Link açıqlığı

Qırım ve Donbassta insan aqlarınıñ bozulmasına alâqası olğanlar küçlü halqara basqı altında olacaqlar – ukrain diplomatı


Aleksey Makeyev

İşğal altında bulunğa Qırım ve Donbassta insan aqlarınıñ bozulmasına alâqası olğanlarnıñ episi, dünya cematçılığınıñ sanktsion basqısı altında qalacaqlarını añlamaq kerekler. Böyle bir fikirni Pragada Azatlıq Radiosına berilgen intervyuda Ukraina MİDi siyasiy departamentiniñ müdiri Aleksey Makeyev bilidirdi.

«İnsanlarğa nisbeten zulum yapılması, tutulıp alınması, mahkemesiz ölüm cezası çıqarılması, bizim siyasiy mabüslerimizge eskence yapılmasına alâqası olğan bu şahıslarnıñ episi, insanğa zulum yapqanları içün dünya cemaatçılığınıñ yaqın taqibi altında qalacaqlarını añlamaq kerekler. Olarğa qarşı sanktsiyalar kirsetilecek, olar başqa devletlerge barıp olamaycaq, bank esaplarına qullanıp olamaycaq, mülk saibi olamaycaq - yani olar dünya cemaatçılığınıñ pek küçlü bir sanktsiyalar basqısı altında qalacaqlar», – dedi Makeyev.

Onıñ sözlerine köre, Ukraina MİDi işğal altındaki Qırımdaki insan aqlarınen bağlı vaziyetni taqip etmekte.

Qırım Rusiye tarafından isğal etilgen soñ, mustaqil jurnalist, qırımlı faaller, qırımtatar halqı Meclisiniñ azaları ve Rusiyede yasaq etilgen “Hizb ut Tahrir” teşkilâtınen bağlı olmasında şeklengen Qırım musulmanlarınıñ evlerinde pek sıq şekilde kütleviy tintüvler keçirilip başladı.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG