Ukrain arbiy mutehassısı Oleg Jdanovnıñ sözlerine köre, Rusiye Silâlı quvetleri, 2014 senesi öz antını bozıp Qırımnı işğal etkenlerniñ tarafına keçken sabıq ukrain arbiylerinden azar-azar qurtula. Böyle fikitni Jdanov, Rusiye FSB hadimleri tarafından Qırımda yapılğan tevqif etüvlerni izaatlap, Qırım.Aqiqat Radiosınıñ efirinde seslendirdi.
«2014 senesi ukrain antını bozıp, Rusiye Silâlı quvetlerine keçkenlerniñ episi FSB-niñ ayrı esabında buluna. Olar yarımadada qalacaq, dep vade etilgen olsa da, 2016 senesinden başlap Qırımdan uzaq yerlerge hızmetke yollanıla, ya da işten çıqarılacaqlarına işaret etile. Rusiyeniñ Qırımda yerleştirgen arbiy tehnikanıñ sayısı köz ögüne alınsa, arbiy obyektlerde sabıq ukrain ofitserleriniñ bulunması pek istenilmez», – dep qayd etti ekspert.
Rusiyeniñ Federal havfsızlıq hızmeti (FSB) sentâbrniñ 29-da Qırımda Ukraina içün casuslıq yapmasında şeklengen eki Rusiye vatandaşı yaqalanğanını bildirdi. Bular – Anna Suhonosova ve Rusiye uquq qoruyıcısı Dmitriy Dolgopolov olğanlar. Ekincisi, Ukraina Silâlı hızmetleriniñ Baş merkez temsilcisi Vladislav Seleznövniñ sözlerine köre, yarımadanıñ istilâsından evel ukrain ordusında hızmet etken edi, 2014 senesi fevral-mart aylarında ise rusiyelilerniñ hızmetine keçken.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
