Link açıqlığı

Çubarov: Qırımnı azat etmek mecburiyetini muzakere etmeyip Putinnen dialog qurmaq – nazilerni uslandırmaq siyasetiniñ tekrarıdır


Qırımtatar Milliy Meclis reisi, Ukraina millet vekili Refat Çubarov bazı avropalı siyasetçilerniñ tekliflerini izaatlap, halqara uquqnıñ qaidelerine riayet etmek ve işğal etilgen ukrain topraqlarını azat etmek mecburiyetini muzakere etmeyip Rusiye prezidenti Vladimir Putin ile dialog qurmaq teklifini – natsist Almaniyağa nisbeten uslandıruv siyasetiniñ terkrarlanuvınen teñleştirdi.

Bunı o sentâbrniñ 25-ndeLublinde Şarqiy Avropa teşebbüsleri Kongressi devamında yapqan nutuğında seslendirdi.

Onıñ sözlerine köre, «o zaman böyle bir siyaset Versal sistemasınıñ, Milletler Ligasınıñ,kütleviy telükesizlik sistemasınıñ bozulmasına sebep olğan edi ve neticede Ekinci cian cenki başlanğan edi».

«Aqiqat şunda ki, Ukrainağa qarşı cenk başlatqan ve başqa devletler içün telükeli olğan Rusiyege qarşı sert tedbirlerniñ alınmaması Putinniñ közlerinde Ğarpnıñ umumiy zayıflığı kibi qabul etile ve bunıñ aqibetleri de bar», – dedi Çubarov.

Meclis reisi qayd etti ki, «sanktsiyalar sayesinde Rusiyeniñ daa çoq ukrain topraqlarına yapacaq ücümları toqtatıldı».

Avgustnıñ başında Almaniyanıñ FDP fırqasınıñ yolbaşçısı Christian Lindner, Rusiye ile munasebetlerni tüzetmek kerekligi aqqında beyan etti ve Qırımnıñ Rusiyege ait olğanını qabul etmege teklif etken edi. Siyasetçi Ukrainada ve AFR akimiyetinde tenqid etildi. Bundan soñra Lindner dedi ki, o yarımadanı Rusiyeniñ qısımı olaraq tanımağa degil de, sadece başqa müim meselelerniñ tüzetilmesi içün Qırım meselesini «dondurmaq» teklif etken eken.

Buña cevap olaraq, Ukrainanıñ Almaniyadaki elçisi Andriy Melnık, Almaniyanıñ FDP fırqasınıñ idaresine hatırlattı ki, Qırım meselesiniñ «dondurılması» amelde Rusiyege nisbeten iqtisadiy sıñırlamalarnı red etmek manasına kelecek. Ve o siyasetçilerni «strategik sabırğa» davet etti.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG