Link açıqlığı

Kreml nezaretindeki Aqmescitniñ Jeleznodorojnıy rayon mahkemesi cuma künü, sentâbrniñ 22-de, Qırım jurnalisti, Radio Svoboda ve Qırım.Aqiqat müellifi Nikolay Semenanıñ ükmüni çıqardı.

Qırım.Aqiqat mühbiriniñ bildirgenine köre, jurnalistke eki buçuq yıl şartlı apis cezası berildi. Üç yıl deñeme süresi ve açıq faaliyet yasağı olacaq.

Tintüv vaqtında çekip alınğan bilgisayarı devletke musadere etilmeli.

Ükümni Aqmescitniñ Jeleznodorojnıy rayon mahkemesiniñ qadısı Natalya Şkolnaya seslendirdi. Qadı Semenanı qabaatlı tanıp, er bir milletniñ kelecegini belgileme aqqı bar olğanına esaslandı ve 2014 senesiniñ Qırım vaqiaları halqara uquqqa uyğun edi, dep ayttı.

«Anayasa yüksek statuslı olıp, bütün Rusiyede keçerlidir», – dep qayd etti qadı. Semenanıñ Rusiye pasportını alması qadı tarafından «Qırımnıñ Rusiyege ait olmasını tanıması» olaraq köründi.

Bundan evel Nikolay Semena mahkemede soñki sözüni aytıp, qabaatlayıcı üküm çıqarılsa, Rusiyedeki jurnalistikağa tesir etilir, dep bildirgen edi.

Sentâbrniñ 18-de prokuror Qırım jurnalisti Nikolay Semenanı üç yılğa şartlı olaraq apiske alıp, üç yıl deñeme müddeti ve üç yıl devamında açıq faaliyet köstermesini yasaqlamağa talap etti.

Radio Svoboda ve Qırım.Aqiqat müellifi, qırımlı jurnalist Nikolay Semena Rusiye akimiyeti tarafından «Rusiye Federatsiyasınıñ topraq bütünligini bozmaq içün kütleviy çağıruvlarda» qabaatlana. 2016 senesi aprel ayında Rusiyeniñ FSB hızmeti onıñ evinde tintüv ötkerdi, mayıs ayında ise o, Qırım.Aqiqatta maqale derc etkeni sebebinden, resmiy iddianame aldı. Şimdiki vaqıtta jurnalist Aqmescitte mahküm etile, ve şeerden çıqmaq aqqından marum etilgen.

Nikolay Semena, öz maqalelerinde «fikir bildirüv serbestligini» eda etkenini ayta.

Uquq qorçalayıcı ve jurnalistler teşkilâtları Nikolay Semenanıñ taqip etilmesini siyasiy basqı olaraq tanıy.

Ukraina Tışqı işler nazirligi işğal etilgen Qırımda Ukraina vatandaşları, şu cümleden Nikolay Semenanıñ taqip etilmesinden qasevetlengenini bildirip, oña qarşı yapılğa basqını toqtatmağa çağıra.

XS
SM
MD
LG