Rusiye işğal etilgen Qırımda qırımtatar tili ve medeniyetini saqlap qaldırmaycaq ve inkişaf ettirmeycek, dep ayttı Qırım.Aqiqat Radiosınıñ «Dnevnoye şou» yayınında sentâbrniñ 14-de professor, közetici, Ekstremal jurnalistika merkeziniñ sabıq reberi Oleg Panfilov.
Onıñ aytqanına köre, Ekstremal jurnalistika merkeziniñ tedqiqat neticeleri köstere ki, Rusiyeniñ ancaq eki regionında yerli kütleviy haber vastaları tuvğan tilni qullana – bu Çeçenistan ve Tataristan.
«İmperatorlıq siyaseti milliy tillerniñ saqlap qalmasını közde tutmay. Rusiyede tamır halqlarnıñ tilleri tamamen yoq olğan regionlar bar, ve tek rusça qullanıla. Rusiyede resmiy şekilde 190 halq yaşay, ve yalıñız ekisi tilini qullana bile. Qırımda da aynı siyaset olacaq, iç şübem yoq», – dedi Panfilov.
Qırım Rusiye kontroli altına keçken soñ qırımtatarlar aqları sıñırlanğanını bildireler. Qırımnıñ Rusiye akimiyeti Qırım halqlarınıñ aq-uquqları aynı seviyede temin etilgen, dep israr ete.
Ukrain uquq qorçalayıcılarınıñ malümatına köre, al-azırda işğal etilgen Qırımda qırımtatarca laf etken balalarnıñ ancaq üçte biri ve ukraince bilgen balalarnıñ altıda biri ana tilinde tasil ala bile.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
