Link açıqlığı

Köteklengen qırımlı Renat Paralamovnı hastahane yanında rusiyeli politsiya hadimleri sorğulay – faaller


Sentâbrniñ 14-nde Aqmescitniñ avtovokzalında, bedenindeki kötek izlerinen tapılğan qırımlı Renat Paralamov, teşkerüvden soñ Aqmescitniñ №6-ncı tez yardım şeer hastahanesi çıqarıldı. Al-azırda o rusiyeli politsiya hadimleri tarafından sorğulanmaqta. Bu aqta Facebook saifesinde qırımtatar faali Abdullah Yakubov bildirmekte.

Qırımlı faaller ayrıca Paralamovqa, özü yürip olamağanı sebebinden, politsiya maşnasınace barmasına yardım etken videonı yerleştirdi.

Advokat Emil Kurbedinov öz nevbetinde «Renatnıñ alı bir qarar olğanı ve artıq laf etmege çaresi olğanı aqqında» bildirdi.

Qırım.Aqiqat advokatnen bağlanıp daa da tafsilâtlı malümat almaq istey.

Daa evel Aqmescit avtovokzalında tapılğan qırımlı Renat Paralamovnıñ aqrabaları ve advokatı, bunıñ arfesinde maska kiygen belgisiz şahıslar tarafından belli olmağan yönelişte alıp ketilgen Paralamovnı «areket etalmaycaq» derecege ketirilgence köteklengeni aqqında haber etken edi.

Ondan soñ Paralamovnıñ advokatlarından biri olğan Rustem Kâmilev, köteklengen Qırım sakinini №6-ncı şeer hastahanesi qabul etkeni aqqında bildirgen edi.

Paralamov, sentâbrniñ 14 kündüz künü öz soy-soplarınen bağlana. O, Aqmescit avtovokzalında ekenligi belli ola. Yerli faaller onen körüşmege keteler. Yerli faaller Facebookta Paralamovnen yapqan körüşüvlerinen bağlı videonı yerleştirip, o pek qattı köteklengeni aqqında haber eteler.

Sentâbrniñ 13, saba Qırımnıñ Seitler qasabasında yaşağan qırımlı Renat Paralamovnıñ evinde, küç idaresiniñ hadimleri «tedqiqat ve taqiqat areketleri» dep adlandırğan tintüv ötkerilgen edi. Advokat Emil Kurbedinovnıñtahminlerine köre, «teşkerüv» Paralamovnıñ diniy saadaki faalleginen bağlıdır. Şaatlarnıñ aytqanlarına köre, maska kiygen ve urbasından kim ekenligi belgisiz olğan şahıslar Parlamovnı belli olmağan tarafqa alıp ketken. Keççe belli olğanı kibi olar onıñ kitap ve notebookını çekip alğanlar.

Qırımdaki rusiyeli küç idarfeleri mesele boyunca resmiy izaat bermegen edi.

Qırım Rusiye nezaretine keçkenden soñ, FSB yarımadada muntazam surette tintüvler keçire, jurnalist, faaller, cemaat erbaplarını sorğulay, qırımtatar vatandaşları tutup ala. Uquq qorçalayıcılar bunı «farqlı tüşüngenlerge qarşı küreş» dep tanıy.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG