Sentâbrniñ 13-nde maska kiygen belgisiz şahıslar tarafından evinde tintüv keçirilgenden soñ, belli olmağan tarafqa alıp ketilgen Qırım sakini Renat Paralamov, sentâbrniñ 14 kündüz künü öz soy-sopınen bağlandı. Advokat Emil Kurbedinovnıñ malümatına binaen, Paralamov Aqmescit avtovokzalında buluna eken.
«O, anda barıp çıqqan soñ, birinin telefonı vastasınen neyerde olğanını haber etti. Bizler şimdi anda ketemiz», – dep bildirdi Kurbedinov Qırım.Aqiqatqa bergen izaatında.
Soñki malümatqa köre, Paralamov Rusiyeniñ Qırımdaki FSB idaresiniñ binasında bulunğan eken.
Amam-aman 24 saat devamında o kimsenen bağlanıp olamağan, aqrabalarınen advokatlar onıñ ne yerde olğanını bilmey ediler.
Faaller Ukraina, Rusiye ve işğal altındaki Qırım ombudsmenlerinden yardım istegen edi.
Sentâbrniñ 13, saba Qırımnıñ Seitler qasabasında yaşağan qırımlı Renat Paralamovnıñ evinde, küç idaresiniñ hadimleri «tedqiqat ve taqiqat areketleri» dep adlandırğan tintüv ötkerilgen edi. Advokat Emil Kurbedinovnıñtahminlerine köre, «teşkerüv» Paralamovnıñ diniy saadaki faalleginen bağlıdır. Şaatlarnıñ aytqanlarına köre, maska kiygen ve urbasından kim ekenligi belgisiz olğan şahıslar Parlamovnı belli olmağan tarafqa alıp ketken. Keççe belli olğanı kibi olar onıñ kitap ve notebookını çekip alğanlar.
Qırımdaki rusiyeli küç idarfeleri mesele boyunca resmiy izaat bermegen edi.
Qırım Rusiye nezaretine keçkenden soñ, FSB yarımadada muntazam surette tintüvler keçire, jurnalist, faaller, cemaat erbaplarını sorğulay, qırımtatar vatandaşları tutup ala. Uquq qorçalayıcılar bunı «farqlı tüşüngenlerge qarşı küreş» dep tanıy.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
