Hersonda «İşğalcige nefret rublesi» aktsiyası çerçivesinde aman-aman doquz biñ Rusiye rublesi (tahminen dört biñ grivna) toplandı. Bu aktsiya esas Ukrainada «Qırım marafonınıñ» devamı oldı. Onıñ neticeleri Qurban bayramı tedbirinde çıqarıldı.
«Hersonda paranı tek qırımtatarlar toplamadı, mında bir çoq cemaat teşkilâtı, şeerniñ aman-aman bütün milliy cemiyetleri iştirak etti. Bunıñ kibi birdemlik areketleri pek müimdir. Er kes Qırımğa terror kelgenini ve oña qarşı küreşmek kerek olğanını añlay... Para o qadar emiyetli degil, bu aktsiyada bir çoq insannıñ iştirak etmesi müimdir. İfadeli bir aktsiya», – dep ayttı Herson şeeriniñ Meclis reisi İbragim Suleymanov Qırım.Aqiqatqa.
Toplanğan paranı eñ yaqın vaqıtta Qırımğa yollamağa planlaştırıla.
İyülniñ 31-nde işğal altındaki Qırımda «Qırım birdemligi» birleşmesi yarımadadaki ukrainalı siyasiy mahküm ve faallerge qoltutmaq maqsadınen «Qırım marafonı» adı altında para toplamağa başlağanını ilân etken edi. Avgustnıñ 22-ne qadar 820 biñ ruble (tahminen 352 biñ grivna) toplandı. Para cezalarınıñ ödenmesi içün sermiya toplanğan olsa da, teşkilâtçılar aktsiyanı devam ettirmege niyetlene.
Aktsiyada 10 rublelik (tahminen 4 grivna) kapikler toplana.
Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket faalleri, Meclis azalarınıñ evlerinde tintüvler sıqlaştı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
