Link açıqlığı

Büyükler Qırımdaki narazılıq aktsiyalarında qırımtatar gençlerine örnek köstere – tarihçı


Qırım tarihçısı Gülnara Bekirovanıñ qayd etkenine köre, bugünde-bugün Rusiye işğal etken Qırımda qırımtatar yaşları narazılıq aktsiyalarında pek faal degil. Lâkin qart nesil vekilleriniñ bir kişilik aktsiyaları olarğa örnek köstere. Bunı Bekirova Qırım.Aqiqatqa ayttı.

«Şimdilik aktsiyalarda daa çoq qartlar, büyükler iştirak ete, gençler az. Lâkin bunı tüşünmek kerek – gençler ne içün faal degil. Al-azırda qart nesilniñ temsilcileri işğal altındaki Qırımda yalıñız başına çıqıp narazılıq bildireler. Amma gençler de qoşula», – dep tüşüne tarihçı.

Bekirovanıñ qayd etkenine köre, qırımtatar milliy areketi zemaneviy gençler içün nümüne ola.

«Qırımtatar milliy areketiniñ bir çoq iştirakçisi ayta edi: «meni apiske atsalar, lagerge yollasalar – zararı yoq, arqamda turğanlar bar, menim yerime başqası kelir»... Qırımtatar milliy areketiniñ esası budır – «er kes biri-birine qoltuta», ve bu tarihnı qaramanlar qura. Biz – qırımtatarlar, biz aqlarımız içün küreşemiz», – dep qayd ete tarihçı.

Avgustnıñ 9-da Kremlge tabi olğan Aqmecitniñ Jeleznodorojnıy rayon mahkesi 76 yaşında Server Karametovnı 10 künge apiske aldı. Er kişi biri kişilik piketke çıqqanı içün «politsiya hadimlerine qarşılıq köstergeninde» qabaatlandı.

Avgustnıñ 14-de Aqmescitniñ Kreml kontrol etken Yuqarı mahkeme, Qırımnıñ parlament ve ükümet binaları yanında apiske alınğan esli-başlı qırımtatar faali Server Karametovğa qoltutmaq içün bir kişilik piketler olıp keçti. Rusiye uquq qoruyıcıları miting iştirakçilerini tutmağa başladı. Çoqusı yiberildi.

Qırım Rusiye kontroline keçken soñ yarımadada FSB jurnalist, faal, cemaat erbaplarını sorğuğa çeke, tintüvler keçire, qırımtatarlarnı yaqalay. Uquq qorçalayıcılar bunı «farqlı fikirler ile küreş» dep adlandıra.

XS
SM
MD
LG