Link açıqlığı

Eski siyasiy mabüsler Rusiyede mahküm etilgen qırımlı Zeytullayevge qoltutmaq içün video muracaatını azırladılar


Ruslan Zeytullayev

Sovetler zamanında apiste yatqan Poloniya ve Ukraina dissidentleri ve zemaneviy Rusiyeniñ siyasiy mabüsleri mahküm etilgen qırımlı Ruslan Zeytullayevge qoltuttı. Videonı «Euromaydan SOS» cemaat teşebbüsi azırladı.

Qırımtatar halqınıñ lideri Mustafa Cemilev de Zeytullayevniñ yaqın vaqıtta azat etilecegine ümüt etkenini bildirdi.

«Emin ol ki, qardaşım, sen o qadar uzun müddet anda qalmaycaqsıñ. Yüce Allahnıñ yardımınen biz Qırım yarımadasını işğalcilerden ve hainlerden temizleycekmiz. Seniñ de tez vaqıt andan qurtulışıñ içün elimizden kelgenini mıtlaqa yapacaqmız. Bundan seniñ iç şübeñ olmasın. Sen çoq cesür ve sabırlı insansıñ. Allah senden razı olsun. Ümüt etem ki, yaqın zamanda biz ana toprağımızda körüşirmiz», – dedi Cemilev.

İyülniñ 27-de Rusiye Yuqarı mahkemesi Zeytullayevniñ apis cezasını 12 yıldan 15 yılğa qadar arttırdı. Aqyarlı buña cevap olaraq açlıq grevine başladı. Ukraina Tışqı işler nazirligi Rusiye Yuqarı mahkemesiniñ qararına narazılıq bildirdi.

Rostov-na-Donu şeerindeki Şimal-Kavkaz bölge arbiy mahkemesi 2016 senesi sentâbrniñ 7-de Zeytullayevni «terrorist cemiyette iştirak etkeninde» qabaatlı olaraq tanıp, oña 7 yıl apis cezasını berdi. Rusiye prokuraturası Rusiye Yuqarı mahkemesiniñ bu qararına itiraz bildirdi ve dava tekrar baqılması içün kene Şimal-Kavkaz bölge arbiy mahkemesine qaytarıldı. Taqiqat organları Zeytullayevnıñ terrorist cemiyet iştirakçisi degil de, teşkilâtçı olaraq tanılmasını istey. Rusiye Ceza Kodeksiniñ bu maddesi eñ azından 15 yıl ve atta ömür boyu apis cezasına ketirmek mümkün.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG