Link açıqlığı

Uquq qoruyıcılar: Rusiyeniñ silâlı küçleri Qırımda tutulğan şahıslarnı ceryan berip qıynay


«Qırım birdemligi» birleşmesiniñ körüşüvi, 26-ncı avgust

İnsan aqları boyunca Qırım kontakt gruppasınıñ koordinatorı Abdureşit Cepparov ikâye etkenine köre, Rusiyeniñ silâlı küçleri tarafından Üç Köz (şimdiki – Novoklönovo) köyünde (10-ncı avgust künü) keçirilgen tintüvden soñ tutulıp alınğan eki kişige nisbeten yapılğan eskence esnasında elektrik ceryan da qullanılğan. Bu aqta Cepparov avgustnıñ 26-nda Bağçasarayda keçken «Qırım birdemligi» birleşmesinñ toplaşuvında ikâye etip berdi.

«Olar Rusiye vatandaşı degil, onıñ içün olar adlarınıñ telâffüz etilmesini istemeyler. Olar aytqanına köre, tintüvden soñ olarnı tutıp alğanlarında, eki ağa-qardaşnı qıynağanlar. Silâlı küç hadimleri olarnı skemlege bağlap urğan. Bir qaç kişi olaraq, ayaqlarınen tepmelegen, eñ soñunda da ceryan berip qıynağanlar. Aytılması ayıp olğan yerlerine demir soqıp, elekrtik ceryan bergenler. Bunı on eki kere yapqanlar. Ondan soñ olarnı qorquzıp, qıynavlar aqqında kimsege ağız açmamalarını tenbilegenler», – dep bildirdi uquq qoruyıcı tutulğanlarnıñ sözlerini bidirerek.

Advokat Edem Semedlâyev de körüşüvde aytılğan malümatnı tasdıqladı.

«Bu adam, izi körünmemesi içün onı büyük ustalıqnen urğanları aqqında ikâye etti», – dedi advokat.

Toplasuvda faaller, ceryan vastasınen yapılğan qıynavlar «Qırımda ilk sefer yapılmamaqta olğanını» qayd ettiler.

Rusiye nezaretindeki Qırım küç idareleri meselenen bağlı izaatını bildirmedi.

Avgustnıñ 10-nda saba Rusiyeniñ silâlı küç hadimleri Qırımnın Qarasuvbazar rayonı Üç Köz (şimdiki – Novoklönovo) köyundeki soqlaqlardan birini qapattı. Evlerniñ birinde tintüv ötkerildi. Belli olğanı kibi, tintüvden soñ aileniñ babası ve ortancı oğlu yarımadanı terk etkenler, kence oğlu ise 15 künge apiske alınğan, aileniñ üyken oğlu evge qaytıp kelgen.

Qırım Rusiye tarafından isğal etilgen soñ, mustaqil jurnalist, qırımlı faaller, qırımtatar halqı Meclisiniñ azaları ve Rusiyede yasaq etilgen “Hizb ut Tahrir” teşkilâtınen bağlı olmasında şeklengen Qırım musulmanlarınıñ evlerinde pek sıq şekilde kütleviy tintüvler keçirilip başladı.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG