Link açıqlığı

Qırımda yerli faallerniñ para cezalarını ödenmesi içün kerek miqdar toplandı – «Qırım birdemligi»


İşğal altındaki Qırımda «Qırım birdemligi» birleşmesi qırımlı faallerniñ para cezalarını ödemek içün 820 biñ ruble (352 biñ grivnağa yaqın–QA) topladı. Bu aqta avgustnıñ 22-nde Qırım.Aqiqatqa bergen izaatında «Qırım birdemligi» cemaat birleşmesiniñ koordinatorı Dilâver Memetov ikâye etti.

«Bügünki künde bizler bütün para cezalarını ödemek içün 820 biñ ruble topladıq. Ve bu, yalıñız Qırımda toplanğan qısmı. Ukraina (esas qısmından – QA), Türkiye ve Almanyadan para daa kelip çıqmadı», – dep ikâye etti Memetov.

Onıñ sözlerine köre, şimdilik «Qırım marafonı» toqtatıldı, lâkin kerek olğanda bir daa canlandırılabilir.

İyülniñ 31-nde işğal altındaki Qırımda «Qırım birdemligi» birleşmesi yarımadadaki ukrainalı siyasiy mahküm ve faallerge qoltutmaq maqsadınen «Qırım marafonı» adı altında para toplamağa başlağanını ilân etken edi. İyülniñ 6-sı, cumaaqşamı künü, Kreml nezaretindeki Bahçasaray mahkemesi Bahçasaydaki qırımtatarlarında keçirilgen tintüvlerniñ şaatı olğan Emil Belâlovnı bir daa «ruhsetsiz mitingte» iştirak etkeni içün 150 biñ rublege (66 biñ grivnağa yaqın – QA) cezalandırğan edi.

Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket faalleri, Meclis azalarınıñ evlerinde tintüvler sıqlaştı.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG