Link açıqlığı

UBP Qırımnıñ rusiyeli akimiyeti yolbaşçılarını yañı şeklev taqdim etmek içün çağıra


Ukraina Baş prokuraturası öz saifesiniñ kün tertibinde işğal altındaki Qırım akimiyetinde al-azırda çalışqan ve sabıq yolbaşçıları gruppasına daa evel berilgen şeklev bidirüvi ve ayrıca yañ şeklev ve taqiqat işlerinen bağlı bildirüvni taqdim etilecegine dair haberni derc etti.

Fevralniñ 17-si olaraq belgilengen kün tertibi: Qırım içki işler naziri Sergey Abisov, Qırım yolbaşçısı ve Nazirler Şurasınıñ reisi Sergey Aksönov, Aqyar yakimiyetiniñ yolbaşçısı Yuriy Doynikov, Qırımnıñ sabıq telükesizlik hızmeti, al-azırda Rusiye FSB hadimi Pötr Zima, Qırım devlet şurası yolbaşçısı Vladimir Konstantinov, Qırımdaki Rusiye sıñır idaresi reisiniñ birinci yardımcısı Viktor Melniçenko, Qırımnıñ sabıq prokurorı, al-azırda Rusiye devlet Dumasınıñ deputatı Natalya Poklonskaya, Qırım nazirler şurası reisiniñ birinci yardımcısı Rustam Temirgaliyev, Aqyar akimiyetiniñ sabıq yolbaşçısı Aleksey Çalıy, Qırım fevqulade vaziyetler naziri, Rusiyeniñ Qırımdaki fevqulade vaziyetler nazirligi baş idaresiniñ reberi Sergey Şahovlarnen alâqalıdır.

Olarnıñ epsi fevralniñ 27-ne Ukraina Baş prokuraturası vaqtınca işğal altındaki Qırım yarımadasında mahkemede cinayet ve qabarcılıqqa qarşılıq kösterüvde, vatandaşlar ya da devlet menfaatlarını qorçalavını temsil etüv meselelernen bağlı cinaiy davalar boyunca protsessual yolbaşçılıq idaresi bölüginiñ prokurorı ögüne çağırıla.

Bu, işğal altındaki Qırımda rusiyeli akimiyetniñ körümlü erbabları gruppasına berilgen ilk çağırtuv degil. Olar şeklev berilmesi içün keçken senede çağırılğan ediler.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG