Kremlniñ nezareti altında Qırım Yuqarı mahkemesi yaltalı «Hizb ut-Tahrir davasınıñ» mabüslerini apiste qaldırdı. Bunı avgustnıñ 18-de «Qırım birdemligi» birleşmesiniñ koordinatorı Dilâver Memetov Qırım.Aqiqatqa bildirdi.
«Er vaqıt olğanı kibi oldı. Mahkeme oturışı qapalı oldı. Soy-soplarını qarar seslendirilgende bile almadılar. Şikâyet arizaları qanaatlendirilmedi. İmaye bergen delillerni mahkeme qabul etmedi», – dedi Memetov.
Kremlniñ nezareti altındaki Qırım Yuqarı mahkemesi avgustnıñ 4-de «Hizb ut-Tahrir davasını» altı mabüsini oktâbrniñ 8-ne qadar apiste qaldırdı. Emir-Üsein Kuku ve Vadim Siruktan ğayrı apiste Enver Bekirov, Müslim Aliyev, Refat Alimov ve Arsen Cepparov yatalar.
Yaltalı «Hizb ut-Tahrir davasınıñ» mabüsleri Refat Alimov ve Arsen Cepparov 2016 senesi aprel 18 künü Qızıltaşta yaqalanğan soñ apiste yatalar. Birinci dört Yaltalı «Hizb ut-Tahrir işiniñ» mabüsi 2016 senesi fevral 11 künü yaqalanğan edi. Olardan eñ çoq tanılğan insan aqları kontakt gruppasınıñ azası Emir-Üsein Kukudır. Ondan ğayrı qurucı olıp çalışqanlar aluştalı Muslim Aliyev ve Qızıltaş köyüniñ sakini Enver Bekirov, em de Yaltalı çeçek satıcısı Vadim Siruk tutulğan edi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
