Link açıqlığı

Aqyar devlet universiteti talebe yetişmemezligi aqqında bildirdi. Şeerniñ eñ büyük AOYU daa evel ajiotaj olğan «İnformatika ve esaplama tehnikası», «Elektronika ve nanoelektronika», «Radiotehnika», «Ciaz sazlama» «Gemiler proyekti ve qurucılığı» zanaatlarına bücette oquycaq talebe toplap olamadı. Er bir zenaatta 3-25 talebelik yer boş qaldı. Abituriyentlerniñ vesiqa berüv müddeti avgustnıñ 21-ne qadar uzatıldı. Avgustnıñ 10-nda Qırım federal universitet denilgen AOYU ilâve talebe almaq istegenini ilân etti, albuki 2017 senesi anda Rusiyeniñ istegen vatandaşı oqumağa kirebile edi.

«Almenda» vatanlaşlıq tasil Merkeziniñ işğal etilgen territoriyalardakilerniñ tasil meseleleri boyunca ukrain eksperti Valentina Potapova Qırım AOYU talebe alınamamasa yarımadanıñ statusı belgilenmegeni sebebinden olğanını bildirmekte.

Qırımnıñ aliy tasil sisteması harabe olmaqta

Valentina Patapova

– 11-nci sınıf mezunlarınıñ sayısı azaldı, çünki ana-babalarnıñ çoqusı Rusiyeden ğayrı iç bir yerde tanılmağan aliy oquv yurtlarınıñ diplomı alınğanını istememekte. Çünki mezunlarnıñ ekseriyeti 10-ncı sınıfqa oqumağa barmadan, muayyen zenaat saibi olmaq maqsadınen tehnikum ve kolejlerge oqumağa kirdiler. 2014 senesi Qırım mekteplerini 15 biñ talebe bitirdi, 2017 ise – 10 biñden de az. Biz alğan malümatqa köre, iç olmağanda olarnıñ 1 biñi esas Ukrainağa oquvğa kirmege ketti, o qadarı ya da ziyadesi – Rusiyege, ondan da ğayrı – sanktsiyalarğa baqmadan Poloniya, Çehiya, Almaniya kibi Avropa aliy oquv yurtlarına kettiler. KFU denilgen AOYU al-azırda 26 biñ talebe oqumaqta, albuki 2014 senesi 36 biñ talebe oquy edi. Qırımnıñ aliy tasil sisteması harabe olmaqta.

Valentina Patapova qayd etkenine köre, Rusiye AOYU Qırımdan kelgenler içün bücet yerlerini qısqartqan, amma alâ daa imtian ve YEGE neticelerine köre qabul etmekte.

Vernadskiy adına Tavriya milliy universitetiniñ rektorı Vladimir Kazarin Ukraina genç qırımlılar içün yapqan küreşini qazandı, dep saya.

Ukraina qırımlı genç nesilni muvafaqiyetnen özüne çekip almaqta

Vladimir Kazarin

– Bizler ilk sefer Qırım sakinleri öz evlâtlarını esas Ukraina mekteplerini bitirmege yollağanlarını közetemiz. Meselâ TMUğa, diger aliy oquv yurtlarına nibseten kirgen qırımlı abituriyent sayısı epsinden yüksek. Olarnıñ arasında hususan esas Ukraina mekteplerinden mezun olğanlarnıñ sayısı daa da ziyade edi. Universitetimizge bağlı kolejge de bayağı bir qırımlı oqumağa kirdi. Bu sebepten KFU paralı zanaat fiyatlarını ziyade arttırdı – rubleden çevirecek olsaq, yıllıq 50 biñ grivnanı teşkil ete. Yaqında bizge Qırım federal universiteti denilgen yerden oquvını devam etmek maqsadınen yarım gruppa bizge avuştı. Men bellesem, Ukraina yarımada sakinleriniñ genç neslini muvafaqiyetnen özüne çekip almaqta.

Vernadskiy adına TDU rektorı Vladimir Kazarin

​Fizika-matematika ilimleri namzeti, siyasiy ekspert Olga Kurnosova, Qırım - Rusiyeniñ aliy tasil sistemasında buhran olğanınıñ açıq misalidir, dep ayta.

Rusiyede istidatlı genç mutehassıslarnıñ yolu qapalı – meraqlı yerlerniñ epsine elitanıñ bala ve torunları yerleşip alğan

Olga Kurnosova

– Kerçekten de, Qırım aliy tasil sisteması deşet bir buhran içinde, çünki bunıñ diger sebebi de şudır ki, Rusiyede yapılğanı kibi AOYU yolbaşçıları yuqarıdan tayin etilip başladı. Orta asılardan berli universitetler rektor saylâvında serbest ve ür olğanınen ğururlana ediler, lâkin 21 asırdaki Rusiye – istisna. Bundan ğayrı, qocaman Rusiyede istidatlı genç mutehassıslarnıñ yolu qapalı: meraqlı yerlerniñ epsine elitanıñ bala ve torunları yerleşip alğan. Bularnıñ epsi abituriyentlerniñ çetelge ketmesine sebep ola.

(Matirialnıñ metin şeklini Vladislav Lentsev azırladı)

XS
SM
MD
LG