Ukraina prezidentiniñ Qırımdaki temsilciliginiñ yañı yolbaşçısı Boris Babin yañı vazifede birinci iş kününi vesiqalarnı ögrenip başladı. Saba saat 7:30-dan Babin sabıq temsilci Natalya Popoviçniñ istifağa yollanılmasını talap etken narazılıq aktsiyasınıñ iştirakçilerinen beraber binağa kirip, temsilcilik hadimlerinen subetleşti, dep haber ete Qırım.Aqiqat mühbiri.
«Birinci vazife – Ukraina prezidentiniñ Qırım Muhtar Cumhuriyetindeki temsilciliginiñ devlet organı olaraq işini temin etmek, hadimler vazifelerini yapmaq kerek. Eñ yaqın vaqıtta qırımlılarnıñ aq-uquqları ve serbestligini qorçalav meselelerini al etmege başlaycaqmız. Devlet yolbaşçısı bergen strategik vazifelerni de becerecekmiz, Qırımnıñ işğalden azat etilmesine qoltutacaqmız», – dep ayttı Babin Qırım.Aqiqatqa.
Narazılıq aktsiyasınıñ iştirakçileri temsilcilik işine başlağanını körip piketni toqtatmağa istey, dep ayttı teşebbüs gruppasınıñ azası Erfan Kudusov.
Avgustnıñ 17-de Ukraina prezidenti Petro Poroşenko Qırım Muhtar Cumhuriyetindeki daimiy temsilcisi olaraq uquqçı Boris Babinniñ tayinlenmesine dair buyruq imzaladı. Poroşenko, İzet Gdanovnıñ Ukraina prezidentiniñ Qırımdaki temsilcisiniñ birinci muavini olaraq tayinlenme qararını da imzaladı.
