Ukraina prezidenti Petro Poroşenko Qırım Muhtar Cumhuriyetindeki daimiy temsilcisi olaraq uquqçı Boris Babinniñ tayinlenmesine dair buyruq imzaladı.
Matbuat hızmetiniñ bildirgenine köre, bu vazifeden Natalya Popoviç çıqarıldı.
Prezidentniñ memuriyeti haber etkenine köre, Poroşenko qırımtatar halqınıñ lideri Mustafa Cemilev ve Meclis reisi Refat Çubarovnen körüşip, prezidentniñ Qırımdaki temsilciliginiñ faaliyetini diqqatnen talil etmege avale etti.
«Maalesef, cemaat faalleri ve Meclis vekilleriniñ maña bergen malümatlarınıñ ekseriyeti tasdıqlandı. Bazı deñişmeler aqqında qarar almağa sebep oldı», – dep qayd etti Poroşenko.
Ukraina prezidenti qayd etti ki, Boris Babinniñ halqara uquq saasında büyük tecribesi bar. Poroşenkonıñ aytqanına köre, o, Adalet nazirliginde çalışıp, insan aqlarınıñ qorçalanması, şu cümleden Avropa insan aqları mahkemesi ve köçip kelgenlerniñ aq-uquqlarını qoruv meselelerinde özüni yahşı taraftan kösterdi.
Prezident memuriyetiniñ bildirgenine köre, Poroşenko, İzet Gdanovnıñ Ukraina prezidentiniñ Qırımdaki temsilcisiniñ birinci muavini olaraq tayinlenme qararını da imzaladı.
2017 senesi iyülniñ 10-dan başlap Hersonda Ukraina prezidentiniñ Qırım Muhtar Cumhuriyetindeki daimiy temsilciligi yerleşken binanıñ yanında Natalya Popoviçni istifağa yollamaq talabı ile narazılıq aktsiyası keçe edi. Faaller «Qırım meseleleri cemaat şurasını» qurıp, narazılıq aktsiyalarınıñ Kyivde keçirilme imkânlarını baqqan edi.
İyülniñ 17-de temsilcilik saytında «sözde «Qırım meseleleri cemaat şurasınıñ» faalleri qanunsız areket etkeni içün vatandaşlar qabul etilmeycegi» aqqında haber etildi.
İyül ayında Ukraina Yuqarı Radasınıñ insan aqları vekâletlisiniñ temsilcisi Mihail Çaplıga Ukraina prezidentiniñ Hersonda çalışqan Qırım temsilciligine muracaat yollap, «qanunlarnıñ bozulmasını toqtatmağa ve vatandaşlarnı qabul etmege» talap etti.
Keçken sene yanvar ayından başlap prezidentniñ buyruğı esasında temsilcilik akimiyetniñ diger organları ile bağ tutıp, vaqtınca işğal etilgen topraqlarda yaşağan ve esas Ukrainağa köçken Ukraina vatandaşlarınıñ serbestligi ve aq-uquqlarına riayet etilmesini temin etmek kerek edi.
2014 senesi mayıs ayından başlap Rusiye Qırımnı işğal etkeni içün Ukraina prezidentiniñ Qırımdaki temsilciligi vaqtınca Hersonğa avuştırılğan edi. Onıñ yolbaşçısı Natalya Popoviç olğan edi.
