2014 senesi mart ayında Aqmescit bediiy müzeyine qanunsız berilgen Ukraina Müzey fonduna ait XVIII-XIX asır ressamlarınıñ resimleri İnterpol üzerinden devlet ve devletlerara seviyesinde qıdırıla. Bunı avgustnıñ 17-de Qırım Muhtar Cumhuriyetiniñ politsiya idaresi bildirdi.
Laf 52 resim aqqında kete, dep qayd etildi.
«Olarnıñ arasında dünyada meşur olğan soyları bar: İvan Ayvazovskiyniñ «Lunnaya noç», İvan Şişkinniñ «Doroga v lesu», İsaak Levitannıñ «Boloto» ve digerleri», – dep aytıla haberde.
Qayd etilgenine köre, Qırım MC Milliy politsiya baş idaresiniñ taqiqatçıları müzey eşyalarınıñ resimlerini taptı. Resimlerniñ fiyatı 2014 senesi martnıñ 20-de tahminen 1 mln 324 biñ dollarnı teşkil etken edi.
Mahkemeden aldın taqiqat devam ete, dep qayd etti Qırım Muhtar Cumhuriyetiniñ politsiya idaresi.
2016 senesi İvan Ayvazovskiyniñ 38 eseri Kefeden Moskvanıñ Tretyakovskaya galereyasına berildi. Ukraina medeniyet nazirligi 1954 senesi Gaaga Konventsiyasınıñ 5 maddesi bozulğanını aydınlattı. O, işğal etilgen topraqlardan qıymetli şeylerni çıqarmağa yasaq ete.
Müzey resimler qaytarıldı ve olarnı qomşu Rusiyege çıqarmağa planlaştırılmay, dep bildirdi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
